«كان بيحب يكتب وأنا جنبه، عشان كدا فضلّت إني أقعد مشتغلش علشان ميأثرش دا على نجاحه»، بهذه الكلمات عبرت رجاء الرفاعي عن حبها الكبير لبطلها يوسف إدريس، وهو السر وراء تألق رائد القصة القصيرة، ورغم سنها الصغير عندما تزوجها إلا أن حبها له دفعها للبحث والمعرفة ثم الالتحاق بالجامعة، لكن مع النجاح الكبير لزوجها تفهمت حياته وحافظت على بيتها، وهو ما تحدثت عنه خلال لقاء سابق مع الإعلامية سامية الإتربي، وتوضحه السطور التالية في ذكرى وفاة رائد قصة الطفل يوسف إدريس. 

كيف حافظت رجاء الرفاعي على بيتها؟

كان يوسف إدريس برغم شهرته يستلهم كتاباته بجانب حبيبته التي فضلّت التخلي عن العمل وتحقيق الذات في سبيل نجاحه وتألقه، «بعد ما ثقفت نفسي وخضت رحلتي مع التعليم، حسيت إني بعرف اكتب نقد وهكون سعيدة جدا إني بشتغل، بس جيت حسبتها حسيت إن شغلي هيضر يوسف جدًا، لأنه بيكتب في البيت، وبيحب لما يكتب أكون موجودة جنبه، وحسيت إني مهما حققت ذاتي مش هيكون زي الإبداع اللي هيطلعه وأنا جنبه، وبحسبة بسيطة حسيت إن العملية هتكون مؤذية ليوسف، مترددتش إني مشتغلش».

كانت «الرفاعي» تدرك أهمية دورها كزوجة لكاتب كبير، تهتم بتفاصيله واحتياجاته: «كنت بلعب أدوار كتير، منها فهم هو بيعمل إيه، أعمله تهيئة للجو وأساعده لأنه كان بيكتب في البيت، وفي بعض الأحيان لازم أبقى أم وأب، بيحتاج مني كتير أكون أم ليه مش بس زوجة».

كيف تعاملت زوجة يوسف إدريس مع معجباته؟

كانت زوجة الكاتب يوسف إدريس لا تعطي أهمية لمعجباته، تتركه حرًا في مواعيده، لا تسأله عما يفعله عندما يتأخر، «مع الوقت حسيت إن فنان متمرد زي يوسف لو أنا منعت عنه الحركة اللي بيتحركها أو تواصل المعجبات هخنقه، وباقتناع شديد جدًا عمري ما غيرت من معجبة، عمري ما قولت اسهر أو متسهرش، كنت سايبة الجزء دا حر فيه، كنت حاسة ديمًا أنه بيحبني جدًا، وفي علاقة قوية بينا تحتمل يكون في معجبات، بالإضافة إلى إني عمري ما بصيت له أنه موظف فلازم يلتزم».

أما عن دور يوسف إدريس كأب فقالت عنه: «كان بيشارك في تربية الأولاد أكتر من أي حد تاني، حاسس بمشاكلهم ويقعد معاهم، ويتناقشوا فيها، أما الحاجات اللي أي أم تقدر تعملها زي اجتماع مجلس الأباء والدروس الخصوصية وغيرها من الحاجات البسيطة، كنت بعملها عشان حرام يبدد وقته فيها».