أثار منشور للبلوجر ولاء محمد، زعمت فيه تعرضها لأعمال سحر من إحدى المقربات منها، وفق قولها، تعاطف المتابعين لها، بعد أن كشفت المدونة، عبر حساباتها على «السوشيال ميديا»، عن تعرضها لـ«أعمال سحر»، من إحدى صديقاتها، لتنتشر روايتها على نطاق واسع عبر مواقع التواصل الاجتماعي.

وبدأت الواقعة بمنشور لـ«البلوجر» اتهمت فيه إحدى المقربات منها بعمل «سحر» لها، قائلة: «لما القريب والصاحب يعمل فيا كده ويدمرني هاستني من الغريب إيه؟ لما اللي أكل معاك عيش وملح وقعد ونام فى بيتك وواثق فيه لأبعد حد، يعمل فيك كده أمال الغريب هيعمل إيه؟ حسبي الله ونعم الوكيل حسبي الله ونعم الوكيل».

وسردت «ولاء» ما كشفته مصادفة، حين شاهدت صورة من زفافها، مدون عليها أعمال السحر قائلة: «أول ما شوفت الصورة والكلام تنحت وجالي صدمة.. أقسم بالله انا لحد دلوقتي مش مستوعبة قلبي هايقف من الصدمة إيه ده؟.. إيه الكلام المكتوب ده؟ ده مكتوب ليا أنا؟ ليه؟ أصعب إحساس حسيته في حياتي عمري ما كنت أتوقع ولا أتخيل أن في يوم أتحط في الموقف ده ليه طيب؟ ليه أنا؟ أنا عمري ما أذيت حد ولا حتى فكرت».

وتابعت «ولاء» في روايتها عن الأضرار التي وقعت عليها من أثر أعمال السحر، بحسب منشورها: «تجيلي الطعنة كده في قلبي مباشرة. ليه عملتي فيا كده أنا عملتلك إيه؟.. ده أنا حياتي باظت وادمرت لما عملتي كده مفكرتيش في حياتي مع زوجي اللي كانت هتدمر ولولا اللي عمله واللي بيعمله حرفيًا كانت كل حياتي انتهت ووقفت طب مفكرتيش في ولادي عايشين بيتعذبوا بسببي إزاي مافكرتيش فيا كأم وأنا بتقطع عليهم وهما شايفني بقع قدامهم ومش قادرة أتحمل مسؤليتهم وهما بعيد عني ومش عارفة أعمل ايه؟».

واستطردت «ولاء» في الحديث عن معاناتها: «وكل ده قدام عينك وما اتهزتيش معقول قلبك حجر أوى كده؟؟ أنا بقيت جسد بلا روح أنا ضعت وضاعت كل حاجة حلوة معايا مبقتش أحس بقيت عايشة عشان بس عمري لسة مخلصش مش أكتر ده أنا خلاص كنت اشتريت الكفن بتاعى عشان قولت دي النهاية أكيد كنت كل يوم أكلم أمى أوصيها على ولادي وأقولها أنا حاسه إنى قربت أموت كل يوم كنت بودع ولادي كل ما أروح أشوفهم».

وتحدثت أيضًا في منشورها عن لجؤها للعلاج النفسي: «وصلت لدرجة إنى بقيت بتعالج نفسيًا وباخد علاج اكتئاب ومهدئات عشان أعرف أنام وأتعايش مع الأيام وبرضوا معرفتش أتعايش بقيت مريضة نفسيه بقيت أكلم نفسى وأقول بقى هى دى آخرتها بقى هى دى أنتى يا ولاء؟».

كما نشرت البلوجر «ولاء» عبر خاصية القصص المصورة لحسابها على «إنستجرام» مجموعة من الصور التي أظهرت تعرضها لنزيف من الأنف والفم دون سبب واضح، كما نشرت صور التحاليل التي أثبتت أنها سليمة لم تعانِ من أعراض.

واقعة «ولاء» تثير غضب رواد التواصل الاجتماعي

وأثار ما نشرته «ولاء» عبر حسابها الغضب بين رواد مواقع التواصل الاجتماعي الذين أعادوا نشر رواية البلوجر الشابة، فكانت من بين التعليقات: «هي الناس اللي بتعمل كده بجد مش عارفين إن جزاءهم جهنم مش عارفين بجد إنهم علشان بيأذوا إنسان هيدخلوا جهنم بدون حساب»، و«حسبي الله ونعم الوكيل.. آخر قرف»، و«حسبي الله ونعم الوكيل في أي حد يفكر يأذي بالشكل ده»، و«بتستفادوا إيه لما تأذوا الناس وتدمروا حياتهم».