قبل يومين نشرت الفنانة صفاء جلال صورة جديدة لها برفقة ابنتها، لتهنئها بها بعيد ميلادها الـ20، وظهرت الفتاة محجبة بجانب والدتها، وكتبت "صفاء" في تعليقها على الصورة، "أمورتي الحلوة بقت طعمة ولها سحر كبير، النهاردة بنتي وأول فرحتي تمت 20 سنة، كل سنة وأنتي طيبة يا قلب أمك".

ولكن تلك الصورة لم تمر مرور الكرام على جمهور ومتابعي صفاء جلال على "السوشيال ميديا"، فقد تعرضت لكم هائل من التنمر والانتقاد لأن ابنتها محجبها بينما هي متخلية عن حجابها، وجاءت في التعليقات، ""ليه متحجبتيش زيها.. مش مكسوفة.. عيب عليكي".

رد صفاء جلال على الانتقادات

وردت صفاء على تلك الانتقادات أكثر من مرة أولها عبر التعليقات عبر صفحتها على "فيسبوك"، فقالت إنها لن ترد لأنها تأخذ من حسنات المسيئين إليها، على حد قولها.

كما ردت في تصريحات خاصة لـ"هن"، على منتقديها بسبب حجاب ابنتها "سلمى"، قائلة: "لا أنا ولا بنتي غلطانين، إحنا الاتنين عاملين اللي يريحنا واللي مقتنعين بيه، مينفعش نتهاجم لأنها حياتنا".

وتابعت: "الكلام الكبير اللي أتقالي بتاع وإنتي يا شيخة، وإنتي فين حجابك، مالهومش حق فيه، خليكم في نفسكم، مش معقولة خلصتوا مشاكلكم وباقي حجاب صفاء جلال هو المشكلة". 

واستطردت: "الحرية الشخصية والدينية لازم احترامها، والتدين مش مختزل في الحجاب بس". 

وعن رد فعلها بعد ارتداء ابنتها الحجاب، قالت صفاء جلال: "اعترضت في الأول لما كانت 15 سنة، وقلتلها صلي الأول وبعدها اتحجبي، وفعلًا اتعلمت الصلاة والتزمت في كل الفروض، وكملت العبادة بالحجاب في الآخر".

وتابعت: "الالتزام بالحجاب موجود في كل الأديان السماوية، المهم نطبقه ويكون تكملة لكل العبادات والفروض".

كما ردت صفاء جلال خلال مداخلة هاتفية مع الإعلامي وائل الإبراشي، في برنامج "التاسعة" المذاع عبر القناة الأولى بالتلفزيون المصري: "طبعا التنمر ده ضايقني وضايق بنتي وأنا بحتفل بعيد ميلادها وأنها تمت 20 سنة وفرحانة بيها وأنا من زمان مدياها حرية الاختيار وأنها تاخد قراراتها بتفكير عميق، والحمد لله معلماها الصلاة والصوم وهي اختارت تبقى محجبة وأنا مش محجبة، بس الحمد لله بعمل حاجات كتير كويسة".

وأضافت: "أنا أمي محجبة وأخواتي كلهم محجبات، وبحترم كل المحجبات وبحترم كل واحد بياخد قرار أنه يعيش بطريقة معينة وأن اللي بيضايقني من السوشيال ميديا التوحش اللي بقت الناس فيه وفيه ناس معلقة منتقدة وبتقول ربنا يكتب لك الحجاب وربنا يكتب لنا كلنا كل حاجة حلوة".

وتابعت: "بس مش معنى أن أنا مش محجبة أني وحشة وأن بنتي محجبة أنها عظيمة وكل واحد فينا بيخطئ وبيصيب وبيحب ربنا بطريقته وأنا بحب ربنا بطريقتي وبنتي بتحب ربنا بطريقتها، وقررت أنها تلبس الزي الإسلامي والحجاب مش فرض على المسلمات فقط لأن الراهبات محجبات والفكرة أن ياريت نحجب لسانا قبل ما نحجب شعرنا وليقل خيرًا أو ليصمت".

واستطردت: "يعني لو أنا مش عاجباك وبتكرهيني وشايفاني وحشة ومن عالم الرذيلة متتعبيش نفسك وتاخدي ذنب عشان كده أنا قولت لهم كتر خيركم على الحسنات الكتير اللي انتوا اديتهوالي، وربنا يجعله في ميزان حسناتي".

واستكملت: "ملايكتي كانت حاضرة وردت على وكان فيه موجة من الحب والاحترام والتقدير من البعض قاموا بالرد على من تنمر علينا ومنهم محجبات ومنتقبات، وأنا عايزة الناس تتقى ربنا شوية لأن سيدنا النبي عليه الصلاة والسلام أمرنا نكون لينين مع بعض وياريت الناس تنصح بطريقة شيك حتى لو شايفيني خاطئة وأنا مش خاطئة وعلاقتي بربنا جميلة".