عرف الفنان رضا البحراوي بحبه الشديد لأهله، وبره بوالديه ووضعهما في مكانة كبيرة بحياته، ومنذ أول ظهور له كان ينسب الفضل الأول لنجاحه إلى والدته وأهله، ومع كل لقاء تليفزيوني له يتطرق فيه إلى عائلته، يصبح حديث مواقع التواصل الاجتماعي.

حب رضا البحراوي لوالدته

تحدث رضا البحراوي، خلال لقائه في برنامج «صاحبة السعادة» على شاشة قناة «dmc»، مع الفنانة إسعاد يونس، عن عوامل نجاحه، موضحا أن على رأسها حبه لوالدته: «أمي هي حياتي كلها، ربنا يطول في عمرها ويديها الصحة والعافية، حتى هي كانت مرتبطة بطنطا أوي، ورافضة تيجي معايا في أي مكان، وأنا مش بعرف أمشي أي خطوة إلا بيها، فجبتها معايا، وأي حاجة صح بعملها عشان خاطر أمي».

رضا البحراوي بعد رضا الوالدين

دومًا ما ترتبط أي إشادات أو نجاح للفنان الشعبي، بجملة رضا البحراوي بعد رضا الوالدين، في إشارة إلى أنهما سر نجاحه وحب الجمهور له، من شدة مراعاته لأهله، إذ قال: «أنا براعي ربنا في كل حاجة، وأنا بحب أهلي أوي وأمي هي كل حياتي، يعني حبي لأمي وبعدين أمي تاني وبعدين أبويا بعد كده أخواتي، بعدهم مراتي وعيالي، كل يوم لازم أعدي على أمي وأقعد معاها وتزعل جدًا لو معدتش عليها، وبلاقيني في ثانية رايح بجري عليها»، وهو ما ظهر في حبه لوالدته إذ ناداها «وصلت ست الكل»، بعدما ظهرت في إحدى لقطات عيد ميلاده.

دعوة أهلي ليا «ربنا يجعلك حنين»

دومًا ما ترتبط عوامل النجاح بكثرة السعي، وهو ما فعله رضا البحراوي حتى فتحت له أبواب النجاح: «وأنا صغير اشتغلت كل حاجة، ومكنتش بعمل أي حاجة غلط، وكنت بساعد والدتي في كل حاجة في البيت، أنا كنت شغال على ميكروباص، وكنت بنادي بصوت طرب، لحد ما جات ليا الفرصة، واتطلبت أغني ووالدتي كانت دايمًا بتبقى قلقانة عليا، وكانت دعوتهم دايمًا ربنا ليا يكرمك ويرزقك ويحفظك، ويخليك حنين على آخواتك، ومعايا أهلي دايمًا اخويا وابن أختي إدارة أعمالي».