ملابس متراكمة في الدولاب، ضلفه مفتوحة باستمرار، أفكار كثيرة للترتيب دون فائدة، مشاهد معتادة شغلت تفكير مروة هريدي، السيدة الأربعينية، من محافظة القاهرة، بسبب فوضى تراكم الملابس، لتقرر حلها بإطلاق فكرة «رتب دولابك»، لمساعدة السيدات على التخلص من الملابس التي لم يعد لها فائدة أو غير مستخدمة.

فكرة «رتب دولابك»

نشرت مروة، الفكرة في جروبها «ليه لأ»، وحازت على إعجاب كثير من السيدات، وتفاعلوا معها، قبل أن تشرحها خلال حديثها لـ«هُن»: «أنا عندي في الجروب أنشطة بقدمها للستات، وجات لي الفكرة لما حد عرض عليا أنزل معرض، عشان أتخلص من الحاجات اللي عندي من الهدوم والجزم والشنط اللي مبقاش ليها استخدام، وبيكون في قسم للحاجات المستعملة والجديدة، وعملت كده وبدلت الهدوم وبيعت هدوم، لقيتني خرجت بفلوس، وكله استفاد».

ما فكرة مروة؟

«كنت بحكي لستات جروب ليه لأ، عجبتهم الفكرة فقلت ليه لأ، لأن الحاجات اللي عندي وحالتها كويسة، ممكن تكون مهمة ومفيدة لحد تاني»، لتنشر الفكرة: «أي حد عنده حاجات في الدولاب من الهدوم، وعايزين تبعوها أو تبدلوها وتروقوا الدولاب، يلا نروق البيت والهدوم والجزم والشنط الحاجات الخاصة، مش بيزنس، يلا بينا نعيد الترتيب من جديد، نزلوها في الكومنتات للتبديل أو البيع».

تبديل الملابس مجانًا وبيعها

تهدف الفكرة إلى التيسير على الجميع، بإعادة ترتيب الدولاب: «دايمًا أنا مقتنعة أنك لما تجيبي حاجات جديدة لازم حاجات قديمة تخرج، وكمان في وقت بتكون الحاجات مبقتش مفيدة أو مكانتش مناسبة من الأول، فعشان كده سميته رتب دولابك القديم، وقررت يبقى في يوم كده كل فترة للتيسير على السيدات بفكرة سهلة وبسيطة تعمل على ترتيب خزانة الملابس أو الدولاب».