كتب: آية أشرف -
07:59 م | الجمعة 08 أبريل 2022
في لحظات مؤثرة، مزجت بين الإيمان بالقضاء والقدر، والشعور بالامتنان، تحدث الفنان أمير عيد أحد مؤسسي فرقة كايروكي ومغنيها الأول، عن مرض والدته، وكيف باتت لا تتذكر اسمه، أو تتذكره بعدما أصابها مرض الزهايمر، معربا خلال لقائه مع الإعلامي أنس بوخش، في برنامجه «ABtalks»، عن شعوره بالذنب والتقصير تجاهها.
وقال «عيد»: «كان نفسي لما أكبر أسفرها وأعوضها عن كل حاجة، لأن كانت رسالتها إنها تطمن عليا بس أنا وأخويا، لكن دلوقتي متعرفنيش، هي عايشة معانا بس مش موجودة، ليالي كتير كنت بعيط، لأني مش عارف أعملها إيه».
كشف أمير عيد، شعوره بالذنب، بسبب مرض والدته، وانشغاله عنها بالعمل، قائلًا: «بحس بالذنب لما تنده عليا وأنا رايح الشغل أو مسافر، بحس بتأنيب الضمير، مع أن الممرضة معاها، وهي أقرب حد ليا، زي أختي بس برده بحس بالذنب، مش عارف أتبسط وهي كده، مش عارف أغني ولا حاجة، أنا مقصر مهما عملت».
وتابع مغني فرقة كايروكي، حديثه عن معاناة والدته: «بتنزل الشارع أحيانًا توزع فلوس على الشارع، وتشتري كل السيديهات بتاعتي وتوزعها، ومش فاكرة حاجة».
أوضح أمير عيد، أنه شعر بالظلم لمرض والدته، ما هز إيمانه وعقيدته: «مش عارف أتقبل الموضوع، ممكن أكون اتعودت وراضي بقضاء الله، بس ذكريات صعبة، إيماني اتهز، لأني حسيت بظلم، لكن لما كنت ألاقيها قايمة تصلي في وقت الأذان، حسيت فيه حاجة سحرية رجعت إيماني بربنا»، مختتما: «أمي بتوحشني، وصعب أنها تكون موجودة ومش موجودة».
