حالة واسعة من التعاطف، من قِبل رواد مواقع التواصل الاجتماعي، أحاطت بالفنانة كارولين عومي، التي جسدت دور «هاجر» بمسلسل «أبو العروسة» عقب أحداث الحلقة 134 من العمل، بعدما اكتشفت خيانة زوجها لها قبل الزفاف بساعات، ليتم بينهما الطلاق قبل حفل الزفاف، وعلى الرغم من أن المشهد تمثيلي، إلا أن الفتيات تعاطفن معها بطريقة كبيرة، حتى تحولت المجموعات الخاصة بالفتيات على مواقع التواصل الاجتماعي، لطرح العديد من الأسئلة حول مشهد مسلسل أبو العروسة، ورد فعل الفتيات حال تعرضهن للخيانة قبل الزواج بأيام، هل يفضلن الطلاق؟ أم إتمام الزواج والسماح بفرصة أخرى؟ 

لو خانك قبل الجواز يستاهل فرصة تانية؟

سؤال تم طرحه على الفتيات، للإجابة عنه، وعن وجهة نظرهن، وعلى الفور أجابت الفتيات بين الرفض القاطع، والتفكير بعوامل ثانوية أخرى.

إزاي نديله الأمان؟

رفض تام من العديد من الفتيات، فردت «آية زناتي» 28 عام، قائلة: «الحياة الزوجية حياة مُقدسة، ليها رونقها واحترامها، فإذا كانت البداية هي الخيانة النهاية هتكون إيه؟!، وإيه إللي هو قدمه عشان تضحي وتتنازل وتديله فرصة تانية، طب ما دي كانت فرصة أولى ومحافظش عليها». 

وأضافت خلال حديثها لـ «هن»: «احنا مش بنختار بس زوج، لكن أب كمان، ومعتقدش أبدًا أن واحدة توافق إن ده يكون نموذج لأولادها، الست مبتقبلش بزوجة تانية تشاركها زوجها، هتقبل بان زوجها اللي قبل ما يتجوزها أصلا خانها!»

«أميرة أحمد» 30 عامًا قالت: «لما هو بدأها كدة أومال بعد الجواز هيعمل ايه!! شرح ووجع الخيانة صعب يتنسي أو تتأقلم عليه، استحالة يكون فيه فرصة تانية»

وأضافت ياسمين سعي» 23 عاما: «الطلاق طبعا هو الحل الصح، ده لسة متجوزهاش وعمل كده ودي كبيرة من الكبائر حاجة كبيرة، مش مجرد شات ولا علاقة عابرة».

واتفقت «لمياء محمود» 29 عاما، قائلة: «الخيانة داء مش بيتعالج، وطالما حصلت مرة هتكرر تاني وتالت لأسباب مختلفة، ولو الشخص سامح مرة في الخيانة الطرف التاني هيعتبر الأمر حق مستباح ليه، والفرصة التانية ممكن تحصل لو الشخص التاني أثبت أنه اتعلم من اللي حصل فعلا». 

بينما ردت «ميرا أبو الفتوح»: «ولا ربع فرصة، الخيانة ملهاش فرص»، وزادت أسماء محمد: «باختصار عمره ما يتعدل إذا كان خانها في الخطوبة اللي المفروض يتمنالها الرضا ترضي فما بالك بالجواز لما تكون خلاص في إيده».

ممكن نفكر في فرصة تانية

رأي آخر مختلف تمامًا، لسيدات فكرن بزاوية أخرى، كانت على رأسهن «أميرة محمد» 30 عاما، قائلة: «بندي فرصة تانية وتالتة وعشرة لما بيكون في أطفال نخاف عليهم وعلى مستقبلهم، لكن لو لسه على البر ومعاها كل الحق تسيبه عادي». 

واتفقت معها «أمل حمودة» 33 عاما: «المتجوزة بتستحمل عشان العيال مع إنها مش مجبرة بس بنقول بيت مايتهدمش إنما غير كدة الطلاق أحسن». 

وتابعت: «منى السعدس» 32 عاما: «أنا شايفة أن الخاين ليه فرصة واحدة بس لو أول مرة وانه فعلا ندمان ويحاول يعالج نفسه».