بعد 9 سنوات من الزواج، أقامت "عزة. ح" 34 عامًا، مدرسة، دعوى خلع ضد زوجها "محمد. أ" 38 عامًا، موظف، حملت رقم 1022/2018، لاستحالة العشرة بينهما.

زواج تقليدي وقع بين الزوجين، تروي الزوجة الثلاثينية: "كان ابن عمي ومتربيين سوا وكنت بحبه من وأنا صغيرة واتخطبنا وأنا في أول سنة في الكلية واتجوزنا في السنة الأخيرة.. مشكلتي معاه إنه عنيف جدا معايا أي حاجة ضرب وإهانة في أقل حاجة ولما خلفت بقى يضرب العيال بشكل قاسي جدا معندهوش تفاهم".

خلافات بين "عزة" و"محمد" على طريقة رعاية الأطفال، تضيف: "أنا مش عايزة ولادي يطلعوا معندهمش كرامة وبيقبلوا الإهانة زي ما أنا اتربيت.. كتير قولتله متضربهمش كدا مينفعش تشتمهم بالألفاظ دي بحاول أعمل لولادي اللي متعملش معايا أنا دوقت الإهانة من أبويا وأمي ومش عايزة ولادي يطلعوا مكسورين زيي".

نزاعات مستمرة بسبب اعتداء الأب بالضرب والإهانة على الاولاد، توضح: "بقى يعند معايا ويضربهم بزيادة ويشتمهم بأوحش كلام ويتعمد يسمعني عشان مقدرش اتكلم ولو دافعت عنهم بيضربني أنا كمان مكسورة ومذلولة عشان بيصرف علينا.. وصل الموضوع إنه بيلسعهم بالنار عشان بيكذبوا ولما أقوله عشان بيخافوا منك يقولي دول مش متربيين وأخرها ضرب ابني بسلك الكهربا عشان رجله اتكسرت وهو بيلعب كورة في الشارع وهو كان مانعه يروح.. ابني الصغير بيقولي أنا بكرهه والكبير بيقولي بتمنى بابا ميكونش معانا في البيت وبنتي بتعمل حمام على نفسها وهي نايمة مش هستنى لما ولادي يحصلهم مصيبة".