هي
كتالوج الحياة

الانفصال، كلمة صعبة أوي على الناس، أول ما أي حد بيسمعها تلاقيه كشر كده وبدأ يسأل أسئلة تعاطف وشفقة.. يعني إيه ده؟ انفصلوا إمتى؟ ليه كده؟ يا حرام.. وجمل كتير من النوعية اللي تقطع القلب.

أنا فتحت الكتالوج في قسم الحياة لاقيت فصل اسمه الانفصال، أيوه أصل الانفصال طلع حياة يا جماعة وإحنا اللي كنا فاهمينه غلط، الطفل بينفصل عن أمه بعد ما شلته في بطنها 9 شهور وبيبدأ حياته.. دي حياة جديدة بينفصل عن الطفولة ويدخل المدرسة.. ودي حياة جديدة بينفصل عن المدرسة ويدخل الجامعة.. ودي حياة جديدة.

الطفل بيكبر ويبقي شاب وينفصل عن أهله ويستقل بنفسه، دي حياة جديدة بيكون عيلته وينفصل عن بيته أهله ويعمل بيته، ودي حياة برضه بيتحول لأب أو أم، مرحلة جديدة وبينفصل عن حياة العزوبية، ودي كمان حياة.. في ناس بتنفصل عن أوطانها، وتبدأ في حتة تانية مع ناس تانية، ودي حياة.

حتى الموت اللي هو تعريفه الانفصال عن العالم والحياة، هو أصلا بداية حياة تانية كلنا عارفينها ومؤمنين بيها.. الكتالوج بيقولك إن كل الصور اللي عرضنها للانفصال، واللي بيختلف الناس في تسميتها ما بين استقلال وهجرة عزال هي كلها ليها معنى واحد وهو الانفصال.

الانفصال من مرحلة مؤقتة عشناها عشان تأهلنا لمرحلة تانية جديدة، وفي كل الأحوال أي انفصال بيتم سواء كان مخطط أومفاجئ، فهو بداية حياة وعمره ما كان النهاية، حتى الانفصال بعد قصة حب وجواز هو فعلا بيجي بعده حياة مختلفة وجديدة للطرفين.. عشان كده عمرك ما تتعامل مع الانفصال على إنه نهاية العالم، الانفصال بداية حياة جديدة.

الكلمات الدالة

أخبار قد تعجبك