رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

كتالوج الحياة.. الحلقة الثالثة

كتب: داليا رشاد -

12:28 م | السبت 11 نوفمبر 2017

كتالوج الحياة الحلقة 3

كام قصة حب انتهت نهاية حزينة؟ كام واحد اتعرض لصدمة عاطفية؟ كام مرة دخلت علاقة عاطفية ماكملتش وحسيت بالفشل والإحباط؟ يووووه كتير..

وردود فعلنا بتختلف بعد كل صدمة عاطفية بنتعرض لها، أغلبنا بيدخل في مرحلة اكتئاب وبيقفل على نفسه ويتقوقع، فيه منا بينطلق ويعمل كل حاجة عكس شخصيته وعكس حياته اللي كان عايشها، لأ وكمان عكس الحبيب اللي صدمه، وفيه منا بتجيله عقدة من الصنف كله ويبدأ يتوتر من أي حد معدي جنبه ويهاجمه لمجرد جنسه.

ماحدش فينا قرأ الكتالوج عشان كده مع نهاية كل قصة حب أو علاقة عاطفيه بنمر بمرحلة الصدمة والفشل، والكتالوج بسيط وبيقول: "كل قصة ليها بداية ووسط ونهاية"، والنهايات بتختلف على حسب البدايات وبتتطور بناء على الوسط، عشان كده النهاية بتبقى في إيد الطرفين مش طرف واحد بس هو المسؤول، ولما نعرف إن المسؤولية بيشولها اتنين ساعتها هانبطل نتساءل ونندم ونستنى ونشيل ونحط في نفسنا.

لو العلاقة انتهت أو طرف من الأطراف اتغيرت مشاعره وقرر ينسحب، ياريت الطرف التاني مايزعلش وياخدها على أعصابه، لأن ببساطة مافيش حاجة اسمها فشل عاطفي دي قصة مكتوب لنا نعيشها ونعدي فيها عشان نتعلم ونتاهل لقصة تانية، وحتى لو دخلنا مليون قصة ومانجحناش فيها ده عادي لأن ببساطة يموت المعلم ولا يتعلم، ومافيش خبير في الحب، الحب بيتغير من مرحلة للتانية في حياتنا يعني حب المدرسة غير الجامعة غير الشغل، والحب الأول غير الحب العاقل غير الحب الصادق.

مافيش حاجة اسمها اتعقدت ومافيش حاجة اسمها مافيش حب، عشان مش كل قصة زي الثانية وماحدش اتولد من بطن أمه معاه الدكتوراه، صاحب الدكتواره ضيع من عمره 30 سنة على الأقل لحد مابقى دكتور، وإحنا ممكن نعيش 30 سنة لحد ما نلاقى الحب، وطول السنين بنعدي بتجارب واختبارات كلها بتعلمنا وتخلينا مؤهلين للحب في وقت وأي سن، فبلاش نقفل الباب، يعني ناخد الصدمة عادي جدا ونبرد شوية وننساها زي ما كنا بننسى المذاكرة زمان.

الكلمات الدالة