كافيه البنات
كتالوج الحياة

حب نفسك هتلاقي اللي يحبك..

حب نفسك.. اقبل نفسك بعيوبك قبل مميزاتك..

لو اتعلمنا القاعدة دي هتسهل علينا حاجات تانيه كتير أوي.. أولها إنك لو قبلت نفسك وحبيتها يعني لاقيت إنك شخص تطاق ويتعاش معاك عادي.. يبقى أكيد أكيد أكيد هتلاقي حد يحبك.. لأ وإيه يتمنى كمان إنه يعيش معاك.. يا سلام ده الموضوع سهل أهو..

لأ هو مش سهل أوي هو محتاج تدريب.. ومحتاج كتالوج زيه زي حاجات كتير في حياتنا.. ليه؟ عشان فيه فرق بين حب نفسك وإقبلها.. وحب نفسك واعبدها..

أما تحب نفسك وتقبلها يعني تقبل فكرة إنك إنسان مش كامل ليك عيوب ومميزات أصل ده النموذج اللي في السوق..

بس ممكن الموديل بتاعك يبقى عيوب أكتر أو مميزات أكتر وممكن يبقى متساوي.. بس الأكيد إن اللي بتشوفه إنت عيوب عند غيرك مميزات والعكس..

أما تتقبل فكرة إنك إنسان بعيوب ومميزات وخير وشر وأبيض وأسود.. وتعرف تتعامل على هذا الأساس هتعرف تسوق نفسك كويس وهتلاقي اللي يحبك ويتمنى يعيش معاك..

إنما لو طول الوقت مبطلعش إلا كل سلبية ومابتقولش إلا عيوب وبس فيك وفي غيرك وفي كل حاجة حواليك.. أحب أبشرك هاتعيش وتموت لوحدك عشان ماعندكش حاجة تسوقها إنت بس بتطفش..

طيب قبل ما نقفل الكتالوج ونفهم كده إننا فهمنا كل حاجة وندوس زورار التشغيل.. عرفت الفرق بين حب نفسك واعبدها.. أصل في ناس بتقرأ وتنفذ على مزاجها فيتحول حب النفس ده لنرجسية..

يعنى بدل مايقبل عيوبه يمجدها.. وبدل ما يشتغل على مميزاته يآلهها.. ويتحول فجأة لاعظم واحد في الكون ومافيش غيره وكل حاجة بيعملها عشان نفسه وبس.. لو وصلت للمرحلة دي أحب أبشرك هاتعيش وتموت لوحدك عشان مش هتلاقي حد يكفيك ولا يملى عينيك..

خير الأمور الوسط يبقى حب نفسك وقبل عيوبك قبل مميزاتك، وافتكر إنك إنسان اتخلقت باليمين والشمال مش one way.

الكلمات الدالة