من أكتر الجمل الأنانية اللي ممكن تسمعها، جملة "حب ما تعمل حتى تعمل ما تحب"، دي بقى مش عملية خالص، تعالوا نفتح الكتالوج قسم الحب، مش هانعرف الحب في المطلق ولا هانيجي جنب الحب والعاطفة دلوقتي هانركز الأول مع اللي يحبك.

الجملة أنانية، أيوه أنانية وهاكررها لآخر الكتالوج، قالك هاتأخد اللي يحبك عشان.. عشان هو اللي هايريحك هو اللي هايبقى حريص يعمل كل حاجة ترضيك، هو اللي هايركز حياته كلها عشانك، طب وإنت.. إنت يا دوب هاتقرر إنك موافق إنك تبقى معاه عشان كل ما سبق.

أنا فكرت أعمل كده مرة وكنت شخصية عندية جدا ومش عايزة أعمل غير كل اللي يناسبني أنا واللي أنا عايزاه، والحجة إنك إنت اللي عايزيني وإنت اللي بتحبني يبقى تمشي بطريقتي، الحقيقة الموضوع مامشيش من أول 3 ساعات، عشان الطرف التاني اكتشف إني بأعرفه مصلحة والحقيقة إن عنده حق، أنا مازعلتش إنه موضوع وماتمش وماحاولتش ابقى ضحية، بس يمكن الموضوع ده علم فيا وعلمني أخد بالي من اللي قدامي عشان هو كمان يأخد باله مني.

طيب الكتالوج في صفحة التعليمات بيقول: "خد اللي يحبك بس حبه".. حبه لأنه بيحبك زي ما إنت ومستعد يعملك كل حاجة في الدنيا، وممكن يعمل أكتر لو لاقي إنك كمان عندك نفس الاستعداد، وإنك بتاخد اللي يحبك عشان هو ده اللي هايشجعك إنك تبقى أحسن، وهايريحك عشان تتقدم وماستنفذش كل طاقتك إنك تتغير عشان تبقى الإنسان اللي تعجبه وممكن يحبك.

بس فيه ملحوظة صغيرة، إنك أما تأخد اللي يحبك ده مش هايلغي أبدا إنك ممكن تأخد اللي بتحبه، ما هو وارد إنك تحب حد والحد ده يبادلك نفس الحب وتقبلوا بعض زي ما إنتوا من غير ما يتحول الحب ده لبهدلة زي ما كلنا حافظين.

تعالوا بقى نقرأ كتالوج "اعمل ما تحب"، ليه مش عملية مش فاهمين، أصلك عمرك ما هاتحب حاجة إنت مجبر عليها، هو لو عندك حساسية من الشطة هاينفع تجبر نفسك زي رامز جلال كده في فيلم "أحلام الفتى الطائش" أما قال لنيللي كريم لو بتحبي الشطة أكل مصنع شطة، دي مش شطارة والله.

إنت ممكن ماتشتغلش اللي بتحبه بس ماتشتغلش وخلاص عشان إنت مضطر تشتغل الشغلانة دي، الكتالوج بيقول "لو اشتغلت حاجة مش بتحبها عشان تبقى عملي ومنتج اربطها باللي بتحبه"، يعني ماتحبش اللي بتعمله إجبار لأ حول اللي بتعمله للحاجة اللي أصلا كان نفسك تشتغلها وبتحبها، وكل شغل فيه مجال للموضوع ده، وواحدة واحدة هاتلاقي نفسك مناسب لأي شغل هاتديله، وبرضه هاتحوله لشغل بتحبه، لحد ما في يوم من الأيام هاتوصل للشغل اللي بتحبه، وهايبقى أي شغل تاني اشتغلت فيه هو مرحلة تمهيدية، ونوع من أنواع الشهادات اللي بتقويك قبل ما توصل لشغلك اللي بتحبه.

تعالوا نجرب الكتالوج ده في الحاجتين دول ونشوف نتايجها ايه، تعالوا نراعي اللي بيحبنا ونحول شغلنا المجبرين عليه لحاجة بنتعلمها عشان نوصل لحاجة أكبر.