رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

بالصور| «مروان» يروي تجربته في شقة «24 متر»: هربت من «النيش»

كتب: دعاء الجندي -

05:47 م | الجمعة 13 أكتوبر 2017

صورة أرشيفية

«غلاء أسعار الشقق».. أزمة يقع فيها غالبية المقبلين على الزواج، بخاصة في ظل ارتفاع أسعار «التشطيب والفرش»، الذي قد يتجاوز 100 ألف أحيانا، في ظل الظروف الاقتصادية الصعبة التي يعاني منها الشباب.

مروان لطفي «32 عامًا»، الذي سكن مع زوجته في شقة مساحتها «24 مترًا»، يقول: «الشقة كانت تجمع ما نحتاجه من أجل حياة كريمة، من ثلاجة وغسالة وكنبة وسرير وأماكن للضيوف».

وأضاف لطفي، في تدوينته عبر «فيس بوك»: «الشقة ديه مساحتها 24 متر، كنت عايش فيها أنا ومراتي، وكنت قاعد بفكر إيه اللي ناقص في الشقة ديه عشان اروح اشتري شقة مساحتها 150 متر؟ لقيت 3 أو 4 حاجات تقريبا: غسالة وثلاجة كبيرة بدل الثلاجة الصغيرة وكنبة ظريفة عشان لو مش عايز اقعد على السرير أو الكراسي ومكان الضيوف يقعدوا فيه».

«قعدت أفكر لقيت إن الغسالة والثلاجة مكانهم موجود عادي بدل الدولاب الأسود، والكنبة مكانها تحت الشباك عادي جدا، ومكان الضيوف هو اللي غالبًا أنا بروح أدفع فيه على الأقل 500 أو 600 ألف جنيه، ده غير فلوس الصالون والأنتريه والسفرة والبوفيه والنيش.. ربنا ياخده!». قال الشاب.

وتابع «مروان»: «هل من الطبيعي إني لو مرتبي 5 آلاف جنيه في الشهر أشتغل وأحوش مرتب 100 شهر عشان خاطر الضيوف، ولو أهلك اللي اشترولك الشقة، هل تستبدل تعب أهلك لمدة 100 شهر على الأقل مقابل راحة مزاج ضيوفك، ناس كتير مش هتتفق معايا عشان ده اللي إحنا اتربينا عليه، وجوازات كتير باظت بسبب مساحة الشقة أو إمكانية الشاب اللي مش قادر يجيب شقة 150 متر دلوقتي في ظل هبل الأسعار اللي احنا فيه، بس أنا آسف إني أقولك ده مش صح، وإن لغاية ما ربنا يكرم الزوجين بطفل ويبقي عنده 3 سنين مثلا، هي ديه الشقة اللي طبيعي الشباب ممكن يسكنوا فيها، وبعد الطفل ما ييجي أو طفلين كمان ممكن الخطوة اللي بعدها تبقي شقة 50 متر برضه مش أكتر من كده».

وأوضح لطفي: «اللي معاه فلوس ومش عارف يوديها فين يشتري اللي هو عايزه حتى لو قصر 1000 متر، أنا بتكلم على الجوازات اللي بتبوظ والشباب اللي بيتداين والبيوت اللي بتخرب بسبب الموضوع ده، وفي الأول و في الآخر هي وجهات نظر».

الكلمات الدالة