مع تغير الأزمنة تتراجع قيمة العملات النقدية ويتم استحداث أوراق نقدية جديدة تتناسب مع العصور الجديدة، فلا يمكنك شراء عدة احتياجات بالجنيه الواحد مثل الأعوام الماضية، لذا نشر طالب في الصف الأول الثانوي، يدعى كيرو نجاح، صورًا "سيلفي" مع مصروفه اليومي المُقدر بـ10 جنيهات، تحت عنوان «رحلة العشرة جنيه».

ووثق «كيرو» ما يمكن شرائه بمبلغ 10 جنيهات فقط بصور حزينة مع تعليق ساخر، عبر حسابه على موقع التواصل الاجتماعي «فيسبوك»، مشيرًا إلى غلاء الكثير من المنتجات ما يجعل مصروفه اليومي لا يكفي لشراء أغلب احتياجاته، معلقًا: «مرتبي قفز قفزة مهولة».

وتفاعل الكثير من مستخدمي موقع «فيسبوك» مع تعليقات وصور «كيرو»، فقالت سارة صادق: «أنت عسل ربنا معاك واتكلم زيادة عن حال الناس فعلا محتاجين شباب صغير في سنك علشان توصل للولاد اللي زيك»، وشبهه البعض بالشخصية الكوميدية في المسلسل البريطاني «مستر بين».

وفيما يلي، تعليقات «كيرو» على قيمة الـ10 جنيهات:

- «حقيقي من كمية الفرحة مش عارف اعمل إيه بالمبلغ العظيم ده بس قولت بما إني اتشهرت بقي وكده لازم ابقي مثقف...هو ده مفيش غير الكتب».

- «أجيب إيه؟.. روايات؟ مش لما اعرف أخلص كتب المدر.. إحم بلاش الكلمة دي عشان في ناس بتتقمص.. جرايد؟ مش بعرف أحل السودوكو وبضرب البوز إياه والناس تكرهني...هي مجلة ميكي مليش غيرها إيه ده ميكي إيه؟! هتعلق في البيت لو مسكت حاجة ملهاش علاقة بأولى ثانوي مدة تزيد عن 3 دقائق.. أشوف حاجة تانية أحسن».

- «هو مفيش غير دعاء الوالدين اللي هينفعني في الوقت ده عشان كده روحت أجيب لأمي كيلو ليمون يمكن ترضي عني ياما».

- «بعد التفكير نزلت بالليل ومقرر هعمل إيه هو كارت شحن بعشرة جنيه هعوز إيه في حياتي بعد كده؟».

- «يعني الكارت اسمه 10 بـ12.5 ويديني رصيد 7 جنيه.. شفت العصفورة؟؟».