كتب: نرمين عزت -
12:55 م | الإثنين 26 يونيو 2023
«عوضني عن فقدان الأب وأعطاني الحب الحقيقي».. هكذا وصفت الفنانة ميمي جمال قصة الحب التي جمعتها بزوجها الفنان الراحل حسن مصطفى، خلال ظهورها في أحد البرامج التليفزيونية، موضحة أنها صممت على الارتباط به، رغم رفض والدتها زواجها منه.
بدأت علاقة الزوجين بعد زمالة عمل تحولت إلى صداقة، وزواج استمر ما يقرب من 49 سنة، حتى تعرض لأزمة صحية، ظلت فيها ميمي جمال في صحبة زوجها حسن مصطفى ترعاه في مرضه، إذ تقول: «كنا زملاء مع بعض في فرق التلفزيون، وكنا في المسرح الكوميدي وبنعمل مطرب العواطف، أصل وصورة، سفاح رغم أنفه، حاجات كتير أوي».
وتضيف:«في فترة شغلنا سوا كنت مخطوبة لظابط كان عندي 16 أو 17 سنة قعدنا نعرف بعض سنة أوأكثر، وكان شاب زي القمر، وفي مرة قولت له ليه مش نتكلم بقى عشان نتجوز، قالي مستنيكي تبطلي تمثيل عشان اتجوزك، قولت له ما أنت بتيجي توديني التصوير والمسرح وكنت متعاون معايا، قالي لا مينفعش أبقى ظابط ويتقالي أنا شوفت المدام في الفيلم إمبارح، قولت له مقولتش الكلام دا من الأول ليه، معنديش استعداد أسيب شغلي حصلت كسرة جامدة، كنت قولي من زمان، حصل بقى كسرة جوايا جامدة كنت قولت من زمان متسبنيش الفترة دي كلها».
وقررت ميمي جمال إنهاء العلاقة التي استمرت لعام ونصف:« لما سبت خطيبي حسيت بكسرة جامدة جوايا، اشتغلت في مسرحية مطرب العواطف، وحسن كان من النوع اللي يحسسك إنه أبوك ويسمعك للآخر غير أي حد يسيبك ويمشي، والدي اتوفى من زمان، قعدت أحكيله واتعودنا على بعض».
وتابعت: «حسن كان متجوز قبلي وعنده بنت اسمها سمية وفي مشاكل مع مراته، ولما جه سيد بدير قال ليه متتجوزوش، قولت له يا أستاذ سيد هو متجوز لما أموره تستقر ويشوف هو عايز إيه نبقى نتكلم، مقدرش أتجوز إنسان معرفش إيه ظروفه، قاله كلام جميل إدي لنفسك فرصة إذا كنت مستقر في بيتك ولا لأ».
وصلت الخلافات إلى إنهاء العلاقة بين حسن مصطفى وزوجته الأولى، فما كان منه إلى أن قرر الزواج ممن يحبها، وهي ميمي جمال التي قالت:«بعدين طلق وإتجوزنا، وعشنا مع بعض نحو 50 سنة».
بعد الزواج رفضت الإنجاب في السنوات الأولى: «من سنة 60 لحد ما مات متجوزتش غيره، أنا مخلفتش أول ما اتجوزت، لأن لو خلفت مفيش حاجة اسمها طلاق، كان لازم أتطمن إن الراجل دا هو اللي أنا متخيلة إنه هيسلم بناتي لجوازها، قعدت سنة ونص في الأول من غير خلفة لحد ما اطمأنيت إن جمبي راجل حنون عطوف يعتمد عليه، وكل الصفات الحلوة فيه، خلفت منه توأم نورا ونجلا».
يذكر أنه يحل اليوم الاثنين ذكرى ميلاد الفنان حسن مصطفى، الذي اشتهر بخفة دمه، بأعماله الكوميدية المختلفة، وحسه الفكاهي.
