كتب: أمنية شريف -
11:50 ص | الإثنين 26 يونيو 2023
الغيرة والحب صفتان جمعت الفنان حسن مصطفى بزوجته ميمي جمال في علاقتهما الزوجبة، فكثيرًا ما تغنا بحبهما في جميع المحافل، وتربع على عرش الحكايات قصة غيرته الشديدة وخوفه عليها، التي كانت تتضح في مواقفهما وأحاديثهما، وفي ذكرى ميلاده نلقي الضوء على سر خناقة حدثت بينهما خلال عرض مسرحية شهيرة.
أحب الراحل حسن مصطفى الفنانة ميمي جمال بشدة، وتحدث عن كواليس علاقته بالفنانة وقصة زواجهما، في لقاء نادر له: «ميمي عرفت تخطفني من أول نظرة أنا عرفت بنات كتير قبل الجواز، ولكن لما شوفتها الموقف كان متغير، إحنا كنا سوا في فرقة مسرحية في التلفزيون، وكان أول تعامل بينا ومش نافرين من بعض بس مكانش بينا تمازج، لكن الكلام جاب بعضه وكيوبيد الحب ضرب السهم في جتتي وحصل الحب في قلبي».
تحدثت الفنانة ميمي جمال في «الستات مايعرفوش يكدبوا»، على قناة cbc، عن علاقتهما وأسرار وجوانب من حياتهما الشخصية، وسر خناقة بينهما: «كان شديد الحب والغيرة، مرة شافني وكنت لابسة فستان سوارية معجبوش، قالي أنا طالب منك ميبقاش الفساتين مفتوحة ولا قصيرة أوي، قولت له ده مسرح الشكل فيه مهم، وروحت بعدها عادي، وكانت أول مرة أكسر كلامه، وأول ما دخلت البيت قالي أنا قولت لك وأنتِ مسمعتيش الكلام، وقام مطلقني بالكلام كده».
حاولت مصالحته بكل الأساليب لكنه رفض، لتقرر استخدام الشال على أي فستان على المسرح بعد ذلك: «كانت أقوى خناقة بينا بعدها اتصالحنا وقولت له يعني يحصل كده من أول خلاف بينا، قالي أنا عندي ثقة عمياء فيكِ، لكن مش عاوز أسمع كلام من الناس عنك، ومن ساعتها أي مسرحية هتلاقوني لابسة فستان مقفول مش قصير ولا عريان».
وعبرت عن شدة حبها له وفقده في لحظاته الأخيرة: «آخر يوم أنا كنت جمبه في المستشفى، وكان نفسه ياكل كومبوت خوخ، سأل عليه قالي نفسي فيه وفضلت جمبه بأكله قالي اشرب شربته جبت له مياه شرب قالي اقعدي جمبي حطيت إيدي على خدي قالي شيلي إيديك من على خدك، قولت له ليه كده كلامك تقيل ملوش معنى بلاش الكلام ده، سند دماغه وبطبطب عليه لقيته في ذمة الله والدكاترة أكدوا قالوا لي البقية في حياتك، وفضلت صابرة في المكان، وكان آخر الطرقة شباك بصيت للسما وقولت يارب»، وبدموع باكية اختتمت كلامها، «نعم الزوج ونعم الأب».
