علاقة صداقة قوية من الطراز الأول، جمعت بين الفنان الراحل وحيد سيف والفنانة عارفة عبد الرسول، إذ بث الثقة فيها، وجعل منها فنانة ذات ثقل بروح مبهجة، وهو ما ألقت الضوء عليه خلال حديثها مع الإعلامي عمرو الليثي، في برنامجه «واحد من الناس» على قناة الحياة، إذ تحدثت عن جوانب من صداقتهما وسر ابتسامتها.

صداقة عارفة عبد الرسول ووحيد سيف

حكيت عارفة عبد الرسول، عن بداية تعارفها بالفنان الراحل: «الله يرحمه عمل معايا موقف جميل جدًا، ومش نسياه للنهاردة، كان بيعمل مسرحية في إسكندرية، وكان في ممثلة ليها دور، لكن جالها تصوير في القاهرة، فقالوا لي الأستاذ وحيد عايزني في دور، ولما روحت لاقيت بيقول لي للأسف الممثلة رجعت، ومكملة معاهم وهي إللي هتعمل الدور، قالي بس أنا مش عايز أمشيكِ بابتسامتك الحلوة دي».

وحيد سيف سبب ثقتي في نفسي 

عن علاقة صداقتهما، قالت: «سألني إيه رأيك تقعدي على شباك التذاكر، وفعلًا اشتغلت في المسرح مع أستاذ وحيد سيف أقطع تذاكر للناس، واللي عمله فيا أداني ثقة كبيرة جدًا في نفسي، لأني كنت نحيفه أوي، وبحس أني مش جميلة، لكن لما قالي ابتسامتك جميلة، متتصورش عملت فيا إيه الكلمة ديه، ولحد النهاردة أنا ببتسم، لما بفتكر دعمه ليا، لأنه أداني ثقه في ابتسامتي وفي نفسي الله يرحمه».

قاطع عمرو الليثي، عارفة عبد الرسول، قائلا: «ابتسامتك حلوة وحضورك جميل وطلتك مبهجة»، لترد: «الحمد لله أنا معيشتش طفولتي بس كنت فرحانة جدًا وواثقة في نفسي، ووحيد أداني ثقة كبيرة زي إللي بابا بثها جوايا».