كرست حياتها للفن والمسرح، لم تتخل عن حلمها مقابل الزواج والأمومة، فقط قررت المضي وراء شغفها الأول والأخير، حتى اختارت أن تبقى وحيدة بلا شريك أو طفل يؤنسها طوال حياتها وفترة الشيخوخة والكبر، حتى لُقبت بـ«عذراء السينما المصرية»، هي الفنانة أمينة رزق، صاحبة الطلة الأولى والعيون الساحرة، التي جسدت دور الأم في الكثير من الأعمال الفنية والمسرحية.

ويتزامن اليوم 15 أبريل، ذكرى ميلاد الفنانة أمينة رزق، ويُقدم «هُن» حكاية خطبتها وعقد قرانها لنفس الشخص مرتين، التي روت كواليسها خلال استضافتها في برنامج مع الإعلامي مفيد فوزي.

أسرار في حياة أمينة رزق

تحدثت الفنانة أمينة رزق، عن كواليس وأسرار في حياتها الشخصية بعيدًا عن الفن، في أثناء حوارها مع الإعلامي مفيد فوزي، قائلة: «اتخطبت كتير ومرة واحدة اللي اتكتب فيها كتابي، وكانت بسبب ضغط من العائلة، ومكملتش الموضوع الكلام ده قبل ما يحصل زفاف وارتباط أو كتب الكتاب».

وجه الإعلامي مفيد فوزي، سؤالًا للفنانة أمينة رزق، قال خلاله: «حقيقي من اللي اتقدموا لحضرتك اسمه وهبي»، لترد الفنانة قائلةً: « بلاش الأسامي، هو ده اللي اتكتب كتابي عليه وكان ضابط، أنا أول ما دخلت مجال التمثيل، كان عن حب وعشق لدرجة لما قدرت احترف المهنة دي مكنتش مصدقة، وكان في الفترة دي الوسط الفني بيعتبر عار، لكن الحقيقة كلنا كنا مؤمنين بالرسالة الفنية، والعائلة رضيت واعتبرت إن شغلي رضا من ربنا وروحت السيدة زينب فرقت فلوس وفول وعيش، كنت طايرة في السماء، وساعتها الشخص ده اتقدملي وماكنش عنده مانع إني أكمل في مجال الفن»

وتابعت: «بعد 6 شهور، اتفاجئت أن الشخص ده بعت عائلته لأسرتي علشان يخطبوني، لأنه كان مسافر» 

حكاية عريس تقدم للزواج من أمينة رزق

وتابعت الفنانة أمينة رزق، الحديث عن أسباب عدم استكمال زيجتها وعقد قرانها، مضيفة: «رفضت مبدأ الجواز نهائي من غير ما أشوفه، وأجبروني إني أقبل الخطوبة، قعدت مستمرة سنتين، والحقيقة ماغيرتش رأيي، هو كان بيقولي على كيفك تكملي في التمثيل، وفي الآخر رفضته وكنت رجعت الشبكة ووقتها رفضت ألبس دبلة».

واستكملت: «هو كان سافر إنجلترا، وبعد 14 سنة فوجئت باتصال منه وطلب يشوفني ويسلم عليا، وزارنا قالي إنه اتجوز ولكن فضلت في قلبه، وقالي إنه اتفق مع زوجته أنها تسافر وترجع لأهلها، وكرر طلبه تاني بالزواج مني، وفضل أهلي يضغطوا عليا أسبوع كامل علشان أقبل وقالوا هنتبرأ منك، وكتبنا الكتاب، بس بعد كده قررت انفصل بسبب زوجته الأولى واتخانقنا».