أجابت الدكتورة هبة قطب، استشاري طب الصحة الجنسية والاستشارات الزوجية والأسرية، على سؤال «أيهما أفضل في الزواج.. المرأة العاملة أم ربة المنزل؟»، قائلة إن المرأة العاملة هي التي تنجح في الزواج مقارنة بالعاملة، «الستات العاملات المتزوجات بأزواج مشغولين ناجحين، لكن الست اللي مش بتشتغل وزوجها مشغول بتبقى كارثة».

حياة الرجل المشغول مع ست البيت «كارثة»

وأضافت «قطب» خلال تصريحات تلفزيونية، أن الزوج المشغول إذا تزوج «ست بيت» ستحدث مشكلات بينهما، لأنها تشعر دائمًا بالملل بسبب جلوسها بالمنزل وحيدة، بينما الزوج يكون مرهقا بسبب العمل طوال النهار، «هتقوله خرجني واتكلم معايا، أنا طول اليوم وشي في وش الحيطان، وبالتالي الست المشغولة نعمة عند الراجل».

وتابعت: «الست والراجل المشغولين بيرجعوا البيت هما الاتنين بيتشاركوا نص ساعة قدام التلفزيون ويتعشوا سوا، وبعد كدة تلاقيهم بيدوروا على السرير عشان يرتاحوا.. دي حياة جميلة عشان هما الاتنين بيستمتعوا بالوقت الفاضي».   

وأكدت أنه وفقا للتجربة العملية فإن المرأة العاملة أفضل عند الرجل من ربة المنزل، «اللي بتشتغل متعودة طول الوقت أنها بتعمل حاجة، وبالتالي لما ترجع البيت بيبقى لسة عندها طاقة أنها تعمل حاجة».

وتحدثت عن تجربة شخصية تعرضت لها، قائلة: «أنا اليوم اللي بقعد فيه في البيت مش بيبقى عندي طاقة أعمل حاجة جوه البيت، لكن اليوم اللي بروح فيه الشغل ببقى راجعة البيت بتبقى طاقتي متفجرة، عشان كدة رأيي إن الست لازم تشتغل».

ضرورة وضع كل الاعتبارات لمعرفة الأنسب لكل حالة

بينما أبدى الدكتور محمد المهدي، أستاذ الطب النفسي بجامعة الأزهر، على صيغة السؤال، قائلا: «مينفعش نقول المرأة العاملة أفضل ولا ست البيت، لكن ممكن نقول الأنسب لوقت ما في مرحلة ما لمرأة ما لرجل ما لأطفال ما، وبالتالي لابد من وضع كل الاعتبارات دي ونقدر نعرف أنهي الأنسب».

وأضاف «المهدي»، خلال تصريحات تلفزيونية، أن الأمور لا تُقاس لمصلحة الزوج أو الزوجة، لكن لابد من معرفة مصلحة الأولاد، «ممكن واحدة تتفرغ للبيت في بداية حياتها عشان عندها أطفال صغيرين».