قالت الدكتورة هبة قطب، إن هناك زوجات يعتمدن على أزواجهن، لأنه بالنسبة لهن «سي السيد»، وبالتالي يُمنع خروجها أو دخولها إلا بإذنه أو أن يكون معها.

خروج الزوج مع أصحابه 

وأضافت «قطب» خلال تصريحات تلفزيونية، «يقولها مثلا يعني إيه رايحة مع أصحابك النادي، أو نازلة عند مامتك من غير ما تقولي لي.. دي الزوجة اللي بتبقى قاعدة بس مستنية جوزها يطل عليها الطلة، ويقعد معاها القعدة وطبعا من جواها هتطق».

وأشارت إلى أن الزوجة من هذا النوع سرعان ما تشعر بالملل، نظرا لأنها تفعل نفس الشيء بشكل نمطي وروتيني كل يوم، «الإنسان ملول بطبعه، ولما جوزها يرجع من الشغل تقوله أقعد معايا طب لاغيني طب، أقعد معايا نتفرج على فيلم.. وبيبدأ الخناق وتقوله اشمعنا أنت تخرج كل يوم، فيقولها أنا مش قادر وأبعدي عني».

وأوضحت أن المرأة العاملة ليس لديها مانع في خروج زوجها مع أصحابه، لأنها أيضًا لها الحياة الخاصة بها، لكن ذلك يشكل لربة المنزل منتهى القهر، «المرأة العاملة الكلام دة ميفرقش معاها، لأن عندها بردو حياة، لكن بالنسبة لست البيت دة منتهى القهر».

الرجالة غلابة ومش بيعرفوا يعملوا إلا حاجة واحدة

وأكدت أن الزوج الواثق من نفسه يحب أن تكون زوجته ناجحة وقوية، «الزوج القوي وعنده شخصية ومقتدر فيه كتير منهم بيبقى سعيد جدا، يكون فيه نموذجين أقوياء أو هرمين في البيت، كل ما زادت ثقته في نفسه كل ما زاد نجاحه في مكانه ورضاه عن نفسه وحياته كل ما زاد بردو رضاه عن نجاح مراته».

وأوضحت أن المرأة تستطيع أن تربي الأولاد وتعمل في نفس الوقت وتكون ناجحة في كل الحالات، عكس الرجل الذي لا يستطيع النجاح إلا في شيء واحد، «الرجالة غلابة ومش بيقدروا يعملوا إلا حاجة واحدة بس، لكن الست ممكن تكون ناجحة في كل حاجة بنفس الوقت، عشان كدة الرجالة بتكون غيرانة».