بعد التصريحات الصادمة التي كشفت من خلالها الفنانة شريفة ماهر، عن التعنيف الذي واجهته من أبنائها وسلب ممتلكاتها، خرج أبناؤها «شريف وناهد» مدافعين عن حقوقهم وتحدثوا من خلال «الوطن» لأول مرة، عن أحاديث والدتهم التي وصفوها بـ«التضارب» والافتراءات.

وذكر شريف نجل الفنانة شريفة ماهر، أن والدته هي رقم واحد في حياته «هي رقم واحد في حياتى وأكن لها بكل حاجة وصلتلها لكن مع الأسف لازم أطلع أوضح.. الشقة دي إللي أنا قاعد فيها حاليًا معايا من 2007 وهي ماضية على العقود وإزاي همضيها من غير ما تاخد بالها طب هعمل كدا مع الشهود إزاي». 

وتابع «شريف» خلال حديثه لأول مرة مع «الوطن»: «كنت بساعدها أنا وأختي ناهد، وأقوالها كلها متضاربة يعني بتقول إني كسرت دراعها وعملت محضر في سنة 2021 بتقول إني سبتها ومن غير إصابات، لكن برضه جايبة تقارير إصابات بتقول إني عملتها الإصابات دي والتقارير من 2016 و2018 ولأن أقوالها المتضاربة النيابة حفظت المحضر».

ابنة شريفة ماهر: إزاي أم تدعي على أولادها

أما ابنتها «ناهد» عبرت عن حالة الصدمة والذهول التي انتابتها: «مكنتش أتمنى ده إللي يحصل الكلام اللى اتقال وجعني، أمال لو إحنا كنا كدا فعلًا.. كانت قالت علينا أيه وعمرنا ما اتأخرنا عليها في حاجة، وكنت بساعدها وابعتلها فلوس وكل حاجة عاوزها، وكلامها كله متضارب مع بعضه».

وعبرت ابنة الفنانة شريفة ماهر عن صدمتها من الأدعية التي رددتها والدتها عليها: «جامدة عليا أوي أن أم تعمل كدا في ابنها  تعمل محضر عشان تحبسه، دعت عليا يجيلي سرطان يهري مصارينى ويجيلي مرض محدش يعرف أيه أوله، إزاي أم تقدر تقول كده، الحكم بينا ربنا هو المطلع واللى عارف إذا كان أنا وأخويا وقفنا معاها ولا رميناها».