بعد 13 عاما من الزواج، أقام "محمد.أ" 41 عاما، عامل بأحد المصانع، دعوى نشوز، ضد زوجته "زينب.م" 39 عاما، مطالبا بتسليمه شقته بعدما اتهمها باستغلال حضانة ابناءه وطرده من الشقة وإقامة دعوى نفقة ضده.

زواج تقليدي وقع بين الزوجين، يروي الزوج الاربعيني: "اتجوزتها كانت مطلقة ورضيت بيها من اول يوم وهي مسيطرة علي وبتاخد مرتبي كله عشان تصرف على البيت وبتديني بس مصروف المواصلات والسجاير بالعافية.. مفيش لقمة عدلة في البيت ولا كلمة كويسة.. خلفت منها ولد وبنت وقولت ارضى بالنصيب وعشت".

خلافات نشبت بين الزوجين بسبب تسلط الزوجة، "مش عايزة كلمة لحد غيرها وأنا بسكت عشان عيالي اللي ربتهم على الجوع.. تقول للواد كفاية كدا قول الحمدلله وقوم من على الأكل، ولما يقولها ياما لسة جعان تقوله أحمد ربنا.. العيال بينامو جعانين ويقولولي يابا نفسنا ناكل للأخر، وأنا مليش كلمة عليها.. اللحمة دي بنشوفها في العيد بس وبالعافية".

صدام عنيف وقع بسبب شراء الزوج كيلو كباب دون علم زوجته: "قالت هتسافر البلد تطمن على اخوها وتشوف امها يومين.. فاشتغلت ربنا رزقني بـ150 جنيه وجبت بيهم كباب للعيال.. بالصدفة رجعت في نفس اليوم وشافت باقي اللحمة وقومت القيامة.. وطردتني قدام العيال من البيت".