بعد أقل من 6 أشهر على الزواج، أقامت "ناريمان. ع" 26 عامًا، دعوى طلاق للضرر، حملت رقم 2058/2019، ضد زوجها "أحمد. م" 38 عامًا، لاستحالة العشرة بينهما، بعدما اكتشفت كذبه وخداعه بعد الزواج.

تعارف وإعجاب متبادل "من أول نظرة"، تروي الزوجة العشرينية، لـ"هن": "اتعرفت عليه في إيفنت في فندق كنت بشتغل فيه واتكلمنا بخصوص شغل وبعدها زارني في الشغل أكتر من مرة وعرض علي الزواج ووافقت لأن شخصيته جذبتني من أول مقابلة".

زواج سريع وقع رغم ارتباط "أحمد" بزوجة أولى، تضيف: "كنت عارفة إنه متجوز وعنده ولاد بس حبه لي خلاني أتجاوز لأنه فهمني إنهما منفصلين وأكدلي إننا هنعيش سوا في الفيلا الخاصة بيه.. وبالفعل اتجوزنا من غير خطوبة وسافرنا شهر العسل".

خدعة تعرضت لها الزوجة، توضح: "خلال فترة التعارف بينا فهمني إنه اتعلم واتربى برا مصر وعلشان كدا ضعيف في كتابة العربي ومحصلش بينا مواقف كتير لها علاقة بالقراية والكتابة قبل الجواز لكن في شهر العسل اتفاجئت بيه مش عارف يقرأ المينيو ولا اسم المطعم أو الفندق اللي قدامه وبدأ يتحجج بشكل سخيف إن نظره ضعيف وإنه ملهوش قوي في الإنجليزي كمان وطبعا شكيت فيه جدا".

مفاجئة تعرضت لها "ناريمان"، تضيف: "بدأت أركز إنه حافظ كلمتين إنجليزي بس بيرسم بيهم قدام الناس وشوية جمل عارفهم كدا لكن مش بيتكلم إنجليزي بطلاقة زي ما كان مفهمني ومبيعرفش يكتب ولا يقرأ ولما طلبت منه أشوف كارنيه نقابة المهندسين اتخانق معايا وبدأ يعايرني إنه اتجوزني بفلوسه ووسامته مش علشان أدور وراه.. لكن لما هددته أفضحه قالي آه أنا متعلمتش ومعييش حتى الابتدائية بس أحسن من أبوكي الموظف المحترم وبكسب وعندي شركة مقاولات وفلوس تشتري أهلك وطردني من الفيلا بهدوم البيت".