أقامت الشابة العشرينية "نادية. س" دعوى خلع حملت رقم 2571/ 2018، بعد عدة أسابيع من عقد قرانها وقالت: "أمه وإخواته اتريقوا على خزين التلاجة اللي اشتريناه ومش عاجبهم.. عايزينا نشتري خزين تلاجة يكفي 3 شهور وأبويا رفض".

"استحملت كتير عشان الجوازة تعدي لكن أهله ماديين جدا.. أقل حاجة بيبصوا عليها ومش سايبينا في حالنا وهو بيقولي كبري دماغك وييجي عليّ"، كلمات بدأت بها حديثها لـ"هن"، متابعة: "مشاكل كتيرة من أول ما اتخطبنا يعلقوا على لبسنا وأكلنا وشربنا.. كنت بستحمل عشان في الأول لكن لما جه وقت الجد ولقيت مفيش فايدة وهو سلبي مبيردش عليهم مقدرتش استحمل إحنا لسه على البر".

وتابعت: "آخر موقف كان أصعبهم وعشان كدا قررت أخلعه لأنه مش راضي ننفصل.. روحت أنا واختي أفرش الشقة وكانت أمه وأخته موجودين فدخلت أحط خزين التلاجة.. أمه اتريقت على الحاجة بتقولي جايبة جبن وكام فرخة هو ده خزين العروسة.. إنتي هتجوعي ابني من أولها.. أومال فين الفريزر اللي مليان بط وحمام ولحمة وفراخ.. فقولتلها دي تلاجة بيتي ملكيش دعوة".

وأضافت: "أسلوبها كان وحش قوي مقدرتش استحمل الإهانة نزلت ورجعت اشتكيت لبابا فقالي هيكلمه عشان كدا عيب قوي.. لما حكاله قاله بنتك قليلة الأدب وميصحش ترد على أمي كدا وإني بكبر الأمور وبعمل مشاكل.. وأنا استحملت جدا مفيش حاجة تخليني أصبر.. أنا عايزة أبدأ حياتي صح".

واستكملت: "بابا اتخانق معاه ولغى الفرح اللي كان بعد يومين وطلب منه يطلقني بالمعروف لكن اختفى ومن يومها مش بيرد علينا.. بقالي شهر على الحال ده.. وعشان كدا لجأت لطلب الخلع".