أقامت الشابة العشرينية "رشا.ن" دعوى "خلع" حملت رقم 6321 لسنة 2018، بسبب استحالة العشرة مع زوجها "أحمد.م"، بعد زواج استمر أيام قليلة لا تتجاوز شهر ونصف، ظهرت خلاله مشكلات كبيرة لم يستطيعا تجاوزها.

فبنبرة صوت حزين قالت رشا: «اتجوزت في بيت عيلة وزوجي كان ضعيف الشخصية جدا قدام أمه.. كنت فاكرة إنه هيعملي كرامة قدامها لكن محصلش.. اتفاجئت بعد الفرح بإن تلاجتي اختفت من الشقة ولما سألت قالي معلش ماما بدلتها ببتاعتها أصلنا هناكل عندها تحت».

وتابعت: «صدمة نكدت عليّ أحلى ليلة في عمري.. وتاني يوم كلمت بابا وقولتله ولماجه يزورني اتكلم بهدوء إنها تردلي حاجاتي عشان أنا لسى عروسة.. ردت بقلة زوق قالت إنها اديتنا راجل وإحنا مستخسرين فيها تلاجة».

وأضافت رشا: «من يوم ما دخلت مشوفتش يوم كويس.. مش عارفة أنام وأرتاح في بيتي وزوجي بتحركه بريموت كنترول.. مقدرتش أستحمل وقولتله عايزة أطلق ورفض.. فاضطريت أرفع خلع».

واستكملت: «ازاي أعيش مع واحد مش عاملي كرامة.. الحمدلله إنها جت على قد كدا لا يمكن أرجعله تاني بعد ما قبل تهزيء أمه لي ولأهلي في البيت المفروض يكون بيتي.. لما سرقت تلاجتي ليلة الدخلة بكره هتعمل فيّ ايه تاني!».