أقامت "لبنى.ن" طبيبة الأسنان صاحبة الـ28 ربيعًا، دعوى قضائية أمام محكمة الأسرة في الكيت كات، تطالب بالخلع من زوجها بعدما اتهمها بالشذوذ الجنسي بسبب ما وصفه لها بـ"الشذوذ الجنسي" بسبب مقابلاتها الكثيرة مع صديقاتها. 

وروت لبنى، لـ"هن"، أنها تزوجت منذ عامين من زوجها الذي يعمل مهندس كهربائي في إحدى الشركات الكبرى، موضحة أنها لم تكن تعرفه قبل الزواج بفترة كافية: "كان جواز صالونات.. اتعرفنا عن طريق واحدة صاحبة والدتي في الشغل واتقابلنا أكتر من مرة، كان شكله كويس ومستواه الاجتماعي مناسب، لكن طلب مني أقعد في البيت في البداية ورفضت لكن بعدها وافقت بحجة إنه هيكون طول الوقت مشغول عشان شغله بيحتاج سفر في المحافظات، واتجوزنا بعد حوالي 5 شهور خطوبة جهزنا فيها البيت".

وتضيف: "خلال الخطوبة كان غيور جدا بيضايق من أقل حاجة لو حد من الجيران سلم علي أو حد علق لي على الفيسبوك لازم أقول مين وأحكي له قصة حياته ولو معجبتهوش يخليني أعمله بلوك، وكنت بضايق بس كل الناس قالوا ده عادي في الخطوبة وبعد الجواز هيتغير".

وتتابع: "في الأول بعد الجواز كان كويس لكن كل ما نخرج نرجع متخانقين أول ما حد يشوفني أو يكلمني يتخانق معايا ويتهمني إنه يعرفني وإني كذابة وبخبي عليه، ولما كنت أقول له صحباتي يزوروني في البيت، في الأول كان يفضل قاعد ملازمنا وطبعا يتكسفوا فا يمشوا ميرضاش يخليهم يجولي وهو في الشغل ويتحجج".

وتوضح: "مع الوقت قولت يمكن مش حابب إني أضايفهم في البيت، لكني بعد 3 شهور بدأت أزهق وأطلب منه إني أخرج معاهم لوحدي في الأول، وبعد إلحاح كتير وافق كام مرة وكان يوصلني ويستناني كأنه مراقبني ويفضل يتصل كتير بشكل مرضي مبعرفش أقعد معاهم ولما أروح يتخانق معايا".

وتطور الموضوع بسبب الغيرة الشديدة وبدأ يتهمها باتهامات غريبة: "منها البرود العاطفي.. وكان أخرها اتهمني بالشذوذ الجنسي مع إننا بنتقابل في أماكن عامة ومفيش بينا حاجة دول صحباتي من سنين وبعضهم كنا سوا في المدرسة والجامعة، وخيرني بين استمرار جوازنا وأصحابي فمستحملتش وسيبت البيت وطلبت الطلاق فرفض بالعند فيّ، وهددني إنه يفضحي ويعمل لي مشاكل، فرفعت خلع".