صراعات مستمرة انتشرت بين الرجال والسيدات في الفترة الأخيرة، فقد ظهرت جروبات نسائية تعبر عن غضب السيدات من الرجال ومن الطريقة العنيفة التي يتعاملن بها، فتم تدشين جروب بإسم "بنكره الرجالة" قامت فكرتة على سرد كل فتاة أو سيدة المعاناة التي تعرضت لها، لتجد تلك الطريقة كنوع من الإرتياح وسبيل للفضفضة، ليرد عليهن الرجال بتدشين جروب بعنوان "بنحب النسوان" آملين في تغيير النساء الصورة التي في أذهانهن عنهن.

وأطلق رجل يدعى مصطفى محمود، هاشتاج "#فرحها_تفرحك"، مضمونه هو اقتراح الرجال طرق لجعل زوجاتهم سعداء وكنوع من التعبير عن حبهم لهن، لإعادة ترميم العلاقات بين الزوجين وإدخال السعادة على البيوت، وهو ما لقى استحسان وتفاعل من قبل الرجال، عن طريق ذكر المواقف التي جعلت زوجاتهم فرحين وسعداء.

ورصدت"هُن" أبرز تعليقات الرجال في طرق تعبيرهم عن حبهم لزوجاتهن منها:

-"عملت حاجة كان مردودها خيالي مراتي الصبح طلبت مني 50 جنيه كمصروف ليها فقولتلها لاء وعلي الساعة 10 صباحاً، روحت محل ورد وجبت ورد وحطيت فيه شيكولاته و100ج وجيبتلها وجبة شاورما وبيبسي وروحتلها كلمتها طلعتلي بره المدرسة "مكان شغلها" والله كان هيجيلها جلطة من الفرحة وروحت بقت توطي عالارض تبوس رجلي، من الآخر لو تقدر تفرحها ماتتأخرش عشان تستحملك وقت زهقك، وأضاف أنه متجوز من حوالي 10 سنوات ولدية 4 أطفال". 

 -"عاملها زي بنتك، هاتلها حلويات وآيس كريم ميجا وإديها مصروف كل يوم الصبح زي ما بتعطي لولادك".

-"أول ما بتحط الأكل على السفرة بفضل أقول وأمدح في الأكل عشان ده بيفرق مع الستات جداً ولما نقوم ونشيل الأكل خالص ممكن أقول ملاحظاتي السلبية".

-"بقت عادة ثابتة عندي إني أفاجئها كل أول شهر لما أقبض أجيب لها ورد وشيكولاتة اللي هي مستوردة مش المصري زي "ميلكا توبليرون" كلها حاجات والله ماتعدي 200 جنية، بس هي فرحتها ماتتوصفش بيهم قد إيه لأنها بتشوف إني مش ناسيها أبدا وعلى طول في بالي ولله الحمد برضه بساعدها في أعمال البيت وكل اللي بقدر عليه بعمله ليها، ربنا يباركلي فيها ومايحرمني منها أبدا أبدا ويحفظها ليا يارب من كل شر".

-"المفأجات اللي من غير معاد ورد، شيكولاتة، هدايا، كروت عليها كلام حلو، تذاكر سفر لمكان عايزة تروحه ويا سلام لو فاجأتها مرة إنك هتوديها عمرة، كل ده غير عيد ميلادها وعيد جوازنا والحاجات الرسمية دي.