تداول رواد مواقع التغريدات القصيرة "تويتر" هاشتاج بعنوان "#إزاي_تشقطيه" غرد المشاركون فيه حيل ونصائح بعض الفتيات للإيقاع بالشباب من أجل الحُب أو الزواج.

وتصدر الهاشتاج تريند موقع التواصل الاجتماعى "تويتر"، فغردت إحدى الفتيات قائلة: "بسيطة أوي أول ما أشوفه في الشارع أروح أسأله لو سمحت ياكابتشن متعرفش شارع يا وحشني إزيك سلامات أروحله منين"، وقالت أخرى: "مفيش راجل بمعنى الكلمة بيتشقط لو الراجل مش تقيل يبقى ولا حاجة".

وعلقت إحدى المغردات بشكل رافض للأمر قائلة: "البنت المفروض يكون عندها حياء عشان دينها وتربيتها ومبادئها".

وعلى الجانب الأخر غرد أحد الشباب قائلًا: "إحنا مش حتة لحمة وشوية دقن.. إحنا بني آدمين لينا مشاعر، منكوا لله يا مجتمع أنثوي متعفن".

"مفيش راجل بيتشقط " هكذا علقت الدكتورة زينب مهدي، استشاري علاقات أسرية وتعديل سلوك، قائلة: "ده مستحيل الراجل لو عاوز يرتبط بيكي هيرتبط ولو مش عاوز مهما عملتي مش هيحصل موضوع الارتباط".

وأضافت "مهدي" خلال حديثها لـ "هُن" إن خطأ التربية والوعي الديني، عاملان أساسيان أوصلا بالفتيات لتلك الحيل، التي تبعد عن الحياء وعن فطرة البنت أيضًا.

واختتمت استشاري العلاقات، حديثها في النهاية بأن بعض الفتيات قد تفلح حيلتها بالفعل، ولكن لفترة مؤقتة، فالرجل في النهاية يعلم أساليب الفتيات، قائلة: "مفيش راجل بيقع لأنه مخلوق ذكي، بس هو بيديكي الفرصة بمزاجه".