كافيه البنات
صورة أرشيفية

في إفيه شهير كلنا اتربينا عليه، سواء سمعناه في المسلسل اللي اتقال فيه أو سمعناه من أهالينا.. افصلي ده التلاجه بتفصل.. أو اعملك قفلة.. يااااه.. الاتنين محدش وقف قدامهم ثانية كده وحاول يفهم معناهم إيه أو حتى حاول ينفذهم.. هو إحنا وإحنا حياتنا كلها أجهزة وآلالات وأسلاك وحركات، مأخدناش بالنا إن مفيش أى جهاز حوالينا شغال 24 ساعة في الـ7 أيام.. وإن كل جهاز بييجي عليه دقايق بيفصل.

بيقفل تماما لا بيرسل ولا يستقبل ولا بيعمل أي حاجة.. طب إحنا مأخدناش بالنا إن دايما الحل المثالي لأي جهاز بيعلق وبيقفش وميرضاش يشتغل بما فيهم بطارية العربية، إننا نفصلها دقايق وبعدين نشغلها تاني، وسبحان الله الروح بتدب في الأجهزة وتشتغل زي الأول وأحسن.. رغم إنها جماد.. فما بالك البني آدم اللي هو إحنا.. أنا حقيقي واحدة من الناس اللي الـsystem بتاعها شغال 24 ساعة، بين سواقة وحركة ورايحة جاية وشغل ومشاوير وأمي وقططي وتفكير تفكير تفكير لما بعد التفكير.. ده أنا بفكر وأنا نايمة.

أنا بيجي عليا أيام يكون عندي حاجة مهمة الصبح من كتر ما بفكر لما بنام بحلم بيها وبتفاصيلها.. وطبعا ده مش مفيد خالص.. ده أنا بصحى متوترة أكتر وممكن اتأخر على ميعادي وممكن أعمل بلاوي.. ويا ويلي لو الدنيا مشيت غير ما كنت بفكر فيها.. يووه عكننة السنين.. عشوائيا كده فتحت الكتالوج والحقيقة لقيت نصيحة دهبية بالكتالوج كله.. النصيحة بتقول دي 10 دقايق فاصل.. افصلي والـ10 دقايق دول وقتك انتي.

هتعملي إيه في الـ10 دقايق دول عشان ترتاحي وتقدري تكملي.. هل هما 10 دقايق تأمل ولا 10 دقايق تعملي حاجة بتحبيها ولا 10 دقايق تسمعي مزيكا حلوة.. لا لا لا لا ولا أي حاجة من دول.. دول 10 دقايق مش هتعملي فيهم أي حاجة حتى التفكير.. 10 دقايق فصلان تماما.. ليه؟.

عشان تشحني وتقدري تقومي تاني تعملي كل الألعاب اليومية اللي متعودة عليها.. الموضوع بسيط ومش محتاج تحضير ولا تخطيط ولا أي حاجة.. والفصلان ده غير النوم على فكرة.. الفلان ده بنفس نظام التلاجة مش فجأة بتلاقيها ولا صوت ولا ضوء ولا تبريد.. هو ده بقى الفصلان المطلوب منك ومني ومن الناس.. 10 دقايق راحة.. 10 دقايق تشحن.. 10 دقايق متعملش أي حاجة.. 10 دقايق لنفسك.. 10 دقايق حياة.. بسيطة ومتجربة.. لو التلاجة اللي إحنا عملينها بإيدينا قدرت عليها إحنا مش هنقدر.. 10 دقايق لنفسي وبس.

الكلمات الدالة

أخبار قد تعجبك