رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

كتالوج الحياة 13| قبل ما تنط من على الكوبري اعرف عمق الميه

كتب: داليا رشاد -

03:12 م | السبت 23 ديسمبر 2017

كتالوج الحياة

أنا قريت في كتاب أمريكاني اسمه قواعد الحياة.. بنفس أداء الفنان سمير غانم الشهير.. مثل عجبني أوي بيقولك إيه.. قبل ما تنط من على الكوبري اعرف عمق الميه.

الحقيقة الكلام ده مكنش مكتوب لواحد عايز ينتحر أكيد، الكلام ده كان مكتوب عشان يفهم الناس اللي بيحبوا المجازفة إنهم قبل ما يجزفوا يحسبوها صح.

أنا بقى ترجمة الكلام الأمريكاني الجميل ده اللي كله إيحابية وتشجيع لكلام عملي جدا ولازم نطبقه في حياتنا.. بس قبل ما افتح الكتالوج عايزه بس أقول حاجة مهمة جدا.. المجازفة حلوة مفيش كلام بتزود الأدرنالين وبتحقق الطموح وكلام ماركتينج كده كتير وكبير وملعبك بس من وجهة نظري المتواضعة.. المجازفة ممكن في أكلة في لبس ستايله جديد عليا في قصة ولون شعر.

لكن المجازفة أما تبقى في حاجات مصيرية أو حاجات ممكن يترتب عليها حاجات تانيه بتتعلق بناس.. ساعاتها لازم لازم نفتح الكتالوج.

الكتالوج بيقول إنك فعلا قبل ما تنط من على الكوبري احسب أو اعرف عمق الميه.. ليه عشان تعرف هتغرق ولا ممكن تعدي عادي.. هتتبسط ولا ممكن تزعل وتزعل ناس تانية معاك.

إيه علاقة ده بالمجازفة والحياة والكلام المصيري اللي اتقال في الأول.. لأ هو له علاقة واضحة وصريحة.. قبل ما تدخل صفقة أو مشروع احسب العمق.. يعني وأنت داخل المشروع هتتكلف كام، هتخسر إيه، هتكسب إمتى هتقدر تدي قد إيه في المشروع ده.

تعالى بقى في العلاقات.. قبل ما تعمل فيها السبع رجالة في بعضو تدل علاقة عاطفية وتوعد وترسم أحلام ومشاريع تخلي اللي قدامك يرسم عليها قلوب وورود ويعيش في الخيال.. يا ريت رجاء مش أمر تشوف ظروفك المادية والعائلية والصحية والعاطفية.. مناسبة للعلاقة دي ولا لأ.. عشان لو نزلت رجل واحدة بس وحسيت إنك غرزت صدقني الطلوع هيبقى صعب فوق ما تتخيل عليك وعلى الطرف التاني. عشان كده متعرضهاش وتوعد باللي مش هتقدر عليه.

ده حتى في التربية الحديثة للأطفال بيوصوا الأهالي إنهم ميوعدوش أولادهم باللي أعلى من إمكانياتهم وإنهم يلتزموا باللي بيوعدوا بيه.

عشان كده حقيقي قبل ما تفرش الأرض ورد في العلاقة عد الورد اللي معاك يكفي لحد فين وأمتى ولو حاسس إن ده آر البوكيه، قول إنك هتفرش ورد في الأول وهنكمل بالباقي فجل... عشان الطرف التاني يبقى على نور ميحملش عليك ويلومك لو مقدرتش تكفيه.

الكلمات الدالة