كافيه البنات
كتالوج الحياة

طبعا أول ما عينينا هتقع على كلمة الكمال هنستنى الجملة التقليدية بتاعت "الكمال لله وحده".. ماشي تمام وحقيقة.. بس الموضوع مش بس كده، هو ليه مفيش حد كامل مع إن كلنا بندور على الكمال حوالينا في كل حاجة.

يعني أول يوم مدرسة لازم نجيب ليستة الطلبات كاملة حتى لو مكانوش الولاد هيستعملوها أول يوم ولا تاني يوم ولا أول أسبوع حتى، وإحنا خارجين إحنا الستات لازم الطقم بالجزمة والشنطة والحلق والاكسسوار كامل، ولو نسينا حاجة منهم نفضل متعكننين لباقي اليوم، أنا عن نفسي يومي بيبوظ وبفقد التركيز لو نزلت ناسية أحط مبرد الضوافر في الشنطة، لازم انزل بالعدة كاملة.. كأني بوتيك متحرك.

لو حد بيجهز عشان يتجوز لازم يفرش الشقة كاملة 3 أوض وصالة ومطبخ بالأجهزة الكهربائية بحاجات المطبخ.. يا كده يا إما يأجل الفرح.. مع إنه بعد الفرح فيه لسه شهر العسل ومن بعده بيبقى فيه عزومات العيلة والأصحاب.. يعني وارد جدا يشوف الشقة ومطبخ الشقة أصلا بعد 6 شهور جواز مثلا.. ده غير إن البيبي بييجي بعد 9 شهور، ومش بينزل على أوضته ده بيدخلها بعد سنتين، يعني فيه أوضة مقفولة سنتين و9 شهور.

إحنا حتى من كتر الجبروت بندور على الكمال في شريك الحياة رغم إن إحنا أصلا مش كاملين.. لو كملنا الأمثلة مش هندخل في الموضوع ولا السنة اللي جاية عشان كده هنفتح الكتالوج وندخل في الموضوع..

الكتالوج بيقول يا جماعة أما إحنا اتكلمنا على إننا نكون الأحسن مش الكويس.. قلنا إن تقدير الأحسن ده نسبي، وإحنا اللي بنحدده.. فليه بقى بندور على الكمال.. وخصوصا الكمال في كل حاجة حوالينا مش فينا إحنا شخصيا.. ليه بندور عليه برانا عشان الكمال مش هيكون شخصيتك.. الكمال مش هيظهر مميزاتك.. الكمال مش هيوصلك لهدفك..

الأحجار الكريمة حلوة بيتعمل منها تحف فنية واكسسوارات وحاجات غالية أوي وبتاخد العقل وتخطف النظر.. طيب خدت بالك إن الأحجار دي كلها عيو..ب يعني اللون مش صافي والشكل مش منتظم.. بس كل حجر وله سحر وجاذبية خاصة..

أصل لولا العيوب والغلطات والفشل مكانتش هتظهر المميزات والجمال والنجاح.. عشان كده مفيش كمال.. متدورش عليه.. مالوش وجود في الوجود وهو فعلا لله وحده.. شوف الحاجة على بعضها واعرف إن الوحش اللي فيها موجود بس عشان يبروز الحلو..

الكلمات الدالة

أخبار قد تعجبك