أنا أكتر وحدة بتعرف تنصح وتفكر للناس لأ وأيه بحل أي عقدة ولا الساحر ده أنا رجعت الراجل اللي بحبه لطليقته بالنصيحة بقول كلام وحلول كلها عملية ومريحة، لكن أجي عندي بقى وفي حالتي ومشاكلي وعقدي واتشل ويجلي حالة فقدان ذاكرة وفقدان نطق وساعات فقدان عقل، لا باعرف أفكر ولا بأعرف أحل ولا حتى بأقبل اسمع واستشير حالة من اللاوعى، ده حال ناس كتير أما بتبقى في مشكلة أو تمر بأزمة أو حتى تبقى تايهة في عنوان في الشارع بس أغلب الناس بتسأل وتستشير حتى لو معاها العنوان و الـgps لكن السؤال ده جزء من طبيعة الإنسان يحب يسأل ويأخد الآراء حتى لو مش هيعمل بيها حاجة حتى لو هينفذ اللي في دماغه.

بس تعالي نركز مع الناصح أو اللى بيدي النصيحة دول أنواع النوع الأول اللي بيفرض عليك نصيحة ويجبرك إنك تعملها عشان هى دي الحل الأمثل ولو معملهاش هيخسر كل حاجة في حياته حتى اللي بينصحه شخصيا هيخسره، النوع ده ياجماعة مدمر هو فاهم  ينصح بس الحقيقة إنه يا عايز الناس كلها تبقى زيه في نفس موقفه يا إما من كتر أما معرفش يوصل للي نفسه فيه بقى عايز يحققه في أي حد تاني مهما كان مين، النوع التاني اللي بيأمر يعني اللى هيقوله هو ده القانون وأي حد هيعمل أي حاجة تانية يبقي غبي وفاشل وهيفشل ومش فالح في أي حاجة الحقيقة إن ده نوع غلبان وعادة الناس بتسمعه من هنا وبتقفل السكة معاه وتفاجأه بعد فترة بإن حياتهم سعيدة وجميلة عشان بس تجنبوهو تجبوا قوانينه، النوع ده بندعي له بالهداية والله النوع التالت اللي هو زي اللي قال الكتالوج.

أنا مش طرف في الموضوع ومطلوب مني النصيحة فبفكر إني في مكان كل الأطراف وأحاول أدي الحلول المناسبة مع مراعاة الطرف التاني من المشكلة وبعرض بس النصيحة وأدي المفتاح لصاحب المشكلة وأقوله ده رأيي وإنت في الآخر هتعمل المناسب ليك واللي هتقدر تعمله، النصيحة هي مجرد أداة بتساعد أو بتفتتح لصاحب المشكلة سكك في التفكير هي مش قانون ومش الخلاصة هي أداة مساعدة مش أكتر لأن لو هي الحل كنت عملت بنصيحتك في حياتك بدل ما تتبرع بيها لغيرك عشان كده النصيحة موجودة للمساعدة.