كتب: مصطفى عنز -
06:54 م | الأحد 17 مارس 2024
في محافظة كفر الشيخ تحوَّلت الشوارع إلى لوحات فنية، من خلال وضع الزينة في الشوارع، بتجميع الورق والأكياس قبل رمضان بفترة قصيرة، ثم تحويلها إلى فروع زينة، ومجموعة من الفوانيس، التي تزين الشوارع، وتنشر فيها الفرحة والبهجة.
تحكي حسناء البيلي عن تلك العادة المتوارثة: «زينة رمضان اختلفت كتير عن زمان، يعني زمان كنا بنقعد نجمع الورق والأكياس قبل رمضان بكام شهر ونقعد نقصهم على شكل فوانيس وأشكال تانية، وكنا بنشتري خيط دوبارة ونجهز دقيق عليه مياه ونعمله عجينة علشان نلزق الزينة، دلوقتى الزينة بقت جاهزة، بس فرحتنا برمضان زى ما هى مش بتتغير».
قديماً كانت تجهيزات زينة الشوارع تصل تكلفتها إلى نحو 20 جنيهاً فقط، وفقاً لـ«محمود خالد»: «زمان كنا بنجمع من كل بيت جنيه، يعنى مثلاً 20 بيت بـ20 جنيها، وده علشان نجهز زينة رمضان، لأن تقريباً كانت كل حاجة موجودة في البيت زي الورق والأكياس والدقيق، بس كنا بنشتري خيط وبعض الأدوات اللي بنشتغل بيها، بس دلوقتي ممكن علشان نجهز شارع، كل بيت بيدفع 50 جنيه مثلاً علشان نشترى زينة جاهزة، وكمان فيه واحد متخصص فى تعليق الزينة وبياخد أجر 100 جنيه عن الشارع».
الفانوس الخشب واكب التكنولوجيا وتحول إلى فانوس من الآركت وصفه «نبيل عبدالله»: «زمان كان الفانوس خشب مع التكنولوجيا اتطور وبقى فانوس من الآركت، كمان اللمبات اللى بتزين الشوارع بقت لمبات ليد وموفرة».