نعت الشيف هالة فهمي زوجها الراحل في أول ظهور لها بعد وفاته، وقالت وهي متأثرة: «إيهاب مكنش بس جوزي ولا عشرة عمري كان أبويا وأخويا وابني أنا اتجوزته وأنا صغيرة، زمان في جيلنا كانت البنات بتتجوز صغيرة، وزي ما كتبت لكم أنا عشت معاه أكتر ما عشت في بيت أبويا».

الشيف هالة: لما أبويا مات محستش بالإحساس

وأضافت الشيف هالة فهمي في تصريحات تلفزيونية: «لما أبويا مات محستش بالإحساس اللي حساه دلوقتي، وحتى أمي لما ماتت زعلت طبعا وحزنت، لكن الزعل والحزن على ؟أمي وأبويا غير اللي أنا حساه دلوقتي، عارفين الجملة اللي بتتقال كده، أنا دوقت طعم المرار، أنا فعلا الفترة اللي فاتت دي أنا حاسه بمرار والوقت طعمه المرار حتى بوق الميه طعمه مر حاسه إني لوحدي رغم كل الناس اللي حواليا».

كان عنده الساعة 12 ميعاد مقدس

واستكملت حديثها بصوت غمرته الدموع، قائلة: «أول مرة أطلع حلقة وهو مش قاعد دلوقتي بيتفرج، كان عنده الساعة 12 ميعاد مقدس، حتى لما الفترة الأخيرة كان تعبان وساعات يغيب عن الوعي، كان يركز وقت البرنامج، والساعه 12 يشاورلهم ويطلب منهم يفتحوا التليفزيون، ومتعودة إني اول ما اخلص الحلقة جري عليه ونحكي اقولع على كل حاجه».

واختتمت حديثها: «هو الونيس وهو عشرة العمر وحبيب العمر، هتقولولي هو في مكان أحسن، وأرتاح.. ربنا يجعل كل الآلم اللي كان فيه شفيع ليه وفي ميزان حسناته، عشرة عمري».