حلت المذيعة رضوى الشربيني ضيفة على برنامج «أنا والقناع» وهو برنامج رمضاني تقدمه الإعلامية منى عبدالوهاب ويُعرض على قناتي الحياة وcbc ضمن خريطة الشركة المُتحدة للخدمات الإعلامية وإنتاج شركة DS+، يستضيف السوبر ستار من الفنانين.

أبرز تصريحات رضوى الشربيني عن الرجال

1-«الراجل الحقيقي لازم يكون قوي ومش قوي بعنتظته وصوته العالي وشخطه ونطره».

2-«الرجل القوي يقويكي ميستقواش عليكي، وحتى عند الفراق يجيبك قدامه ويقولك أنا مش عايز أكمل ولا يجرحك ولا يخونك ولا يهينك».

3-«الراجل لازم يحاول ويكد ويسعى في الدنيا عشان يسعد نفسه ويسعدك، ولازم يكون حنين القلب».

4-«الراجل لازم يكون ضهر وسند وموجود عند اللزوم، ومبيضحكش على بنات الناس ولا بيهينهم».

5- «معنديش فكرة مين اللي صدر إن رضوى الشربيني بتقول اضربي الراجل بالنار، وطلعي من بقك نار زي الديناصورات لما تشوفي الراجل في أي حتة».

6- «أنا ساعات بقول للست عيب احترمي الراجل اللي معاكي وحبيه، وحافظي عليه واكرميه وللأسف السوشيال ميديا لا تنشر ذلك».

7-«فيه فيديو منتشر ليا على السوشيال ميديا والرجالة بتتريق عليا فيه وحقهم سخرت من سيدة بتقول الست مش ملزمة تبات في بيت جوزها قصوا الفيديو، وقالوا رضوى الشربيني بتقول الست مش ملزمة تبات في بيت جوزها».

8-«هو فيه واحدة عاقلة محترمة وبنت ناس ومتربية وحواليها حتى ناس بيشتغلوا معاها هيسمحوا إن فيه إعلامية محترمة بتطلع على شاشة ويسمحوا لها إنها تطلع تقول الست مش ملزمة إنها تبات في بيت جوزها.. أومال تبات فين».

9-«لو حد خانني مش هعيط ولا أدبدب في الأرض ولا هقوله خونتني ليه؟ لكن همشي بس لأنه ميستاهلش».

10-«جوزوني مرة 13 مرة ومرة 16، والحقيقة مرة واحدة، في ناس بتعتقد عشان تنجحي لازم يكون رواكي راجل».

11-«أنا معملتش حاجة في يوم من الأيام تكسر عيني ومفيش راجل يقدر يكسر عيني أو يقدر يقول اديت رضوى الشربيني مليم، أنا ست بشتغل وباحترم نفسي جدا ولو فكرت أتزوج عشان بحب مش عشان راجل يصرف عليا».

12-«لا أسمح لنفسي أن أنهار، وأرى أن مكاني فوق القمر وأبقى قاعدة أنظّر على الناس تحت، وآخد كل اللي بحبهم معايا فوق القمر».

13-«اللي بيضرب مراته مينفعش يتقال عليه راجل، ومن يجبر زوجته على أن تعمل بالسخرة، وهو قاعد في بيته مش راجل».

14- «الراجل اللّي بيعشم المرأة والأخرى بالزواج ولا يوفي بوعده فهو مش راجل».

15- «الراجل الصعب اللّي تقدري تتحملي عيوبه عصبي ويتدخل في كل شؤون حياتك، مسيطر متحكم، قاعد بينظّر عليكي طول الوقت، كل ما هو صعب بس تقدري تعيشي معاه بس الراجل التوكسيك في حتة تانية، هو راجل سام بيكون خاين وبيكون بخيل في المشاعر وبخيل في المادة، وعنده هوس بنفسه، ويدلع نفسه وميدلعش زوجته واللي يتلفظ بألفاظ مش محترمة وبيعمل على قطع الرحم بين الست وأهلها».

16-«أبويا اللي جابني للدنيا راجل، وأخويا اللي واقف في ضهري راجل، وطليقي ووالد بناتي راجل، لكن أنا عدوة أشباه الرجال مش عدوة الرجل».

17-«اللي بيضرب مراته مش راجل، واللي بيشغلها بالسخرة ويخليها تصرف عليه مش راجل، واللي بيعشم البنات بالجواز ويضحك عليهم واللي عمال يجرجر واحدة كانت مراته في المحاكم عشان تمد ايديها عشان تشحت حقها، كل دول أشباه رجال».