قالت الفنانة دينا الشربيني إن علاقتها بالسوشيال ميديا ليست جيدة، ولكنها تفضل تطبيق «تيك توك»، مضيفة:«أنا ميح، مش بخاف من السوشيال ميديا، بس مش شاطرة فيه، وممكن أعك الدنيا، والناس متدخلين في حياة بعض أوي».  

دينا الشربيني: «دمعتي قريبة بس بكره النكد»

وأضافت دينا الشربيني خلال لقاء ببرنامج «معكم منى الشاذلي»، المذاع على شاشة «cbc»، وتقدمه الإعلامية منى الشاذلي، اليوم الخميس، أنها تحب المرح ولكن دمعتها قريبة من عيونها «أنا فرفوشة بس بعيط كتير وده بيخليني أحسن، أنا فيري إيموجن، وأي حاجة صغيرة بتأثر بيها جدا، دمعتي قريبة، بس بكرة النكد».

أضافت: «أي موقف بيحصل كان بيخليني أعيط، كنت أفرح أعيط أو أزعل أعيط، حاسة إن الدنيا متستاهلش، والواحد لازم يحمد ربنا على كل حاجة، ولازم الواحد يبقى راضي ومبسوط باللي هو فيه حتى لو كان في وقت صعب ووحش، وده بيدخل فرحة أكتر».

دينا الشربيني: «عندي مشكلة مع رقم 2»

أشارت إلى أنها تخرجت في كلية الإعلام، ولم ترغب والدتها في دخولها عالم التمثيل، إذ قررت خوض تجربة تقديم برنامج، متابعة: «تجربة فادتني جدا في حياتي»، موضحة أنها ظلت تدرس في الجامعة لمدة 7 سنوات «كنت بدرس بتمعن، كان عندنا أهم حاجة الحضور، فكنت ساعتها بشتغل، أنا عندي مشكلة في رقم 2 سواء تانية إعدادي أو 2 ثانوي، معدتش السنة لكن كان فيه ملاحق بس».