روت والدة الطفلة بطلة فيديو البلكونة الذي انتشر مؤخرا عبر مواقع التواصل الاجتماعي، وظن رواد السوشيال ميديا أن الأب يلقي بابنته من البلكونة، تفاصيل ما حدث في هذا اليوم، وذلك في أول ظهور إعلامي لها في فيديو لايف على شاشة جريدة «الوطن»، وقالت إن ما حدث كان مشاجرة فلم يرغب الأب في إلقاء طفلته.

والدة طفلة البلكونة: خناقة عادية بين أب وابنته

وقالت الأم من مكان عملها حيث تبيع المخلل، في فيديو «الوطن» عن إلقاء أب ابنته من البلكونة: «اللي حصل حاجة عادية بين أب وبنته هي كانت بتجيب تي شيرت أبوها من على الحبل ملقتهوش واتأخرت فخافت ووقعت، وهو كان بيحاول يطلعها ولكن أبوها مقدرش يجيبها لأنه تعبان فجه جيراننا ساعدونا وطلعوا البنت فوق وشدوها وجرينا وأخدنا البنت».

محاولات تهدئة الفتاة باءت بالنجاح من الجيران والأم، «شربناها مياه وأبوها قال دي بنتي برضه لازم أكسبها فجابلها تابلت بالقسط عشان يكسبها ومتخافش منه تاني وهزروا وضحكوا مع بعض ومفيش حاجة ده، هو بيحب عياله وبيعمل المستحيل عشان خاطر عياله وأنا بحاول اساعد ببيع مخلل وسجاير في الفاترينة، ومعايا 3 صبيان وبنوتة واحدة هي دي».

الفتاة تحاول التأقلم بعد الصدمة، «هي بتقولي مش خايفة منه ده بابا يا ماما لا مش بخاف منه».

تفاصيل المشكلة بين الأب وابنته

وأكملت الأم: «كان بيزعقلها عشان اتأخرت في أنها تجيب التي شيرت فزعقلها فخافت ووقعت، هو إللي في إيده مش ليه لو في إيده فلوس بيصرفها علينا ومعوش خالص فلوس، لأنه هو على الله أرزقي ومفيش حاجة ثابتة ولا معاش ولا حاجة خالص».

وعن طلبات الأم قالت: «محتاجة الناس تقف معانا وتخشلنا فلوس كل شهر عشان نعرف نأكل عيالنا، أنا نفسي يطلع لبيته وعياله ويقعد معانا ومش عايزاه يتشاكل معانا وأول مرة يحصل بالطريقة دي الولاد بيحبوا أبوهم أكتر مني أصلا».