قال الدكتور عمرو الورداني، أمين الفتوى بدار الإفتاء ومدير مركز الإرشاد الزواجي، إن أول تحد يواجه المتزوجين في أول سنة زواج، هو «من القائد؟»، متابعا: «التحدي ده تحدي البطولة وتحدي الأميرة».

الزوج الذي يدير مصروف البيت «شحيح»

وأضاف «الورداني»، خلال لقاء ببرنامج «من مصر»، المذاع على شاشة قناة «cbc»، ويقدمه الإعلامي عمرو خليل، «المشكلة الأولى اللي بتواجه الزوجين هو مين اللي يسوق؟ وفيه عبارة أرجو الرجالة متصدقهاش لما مراته تيجي تقوله طبعا أنت اللي تسوق لأنك لو أخدت قرار من غير ما ترجعلها هتحصل مشاكل كتير».

واستكمل: «أكبر فخ ممكن تحطه الست لجوزها لما تضايق منه تقوله امسك المصروف، دي ورطة، والراجل اللي بياخد مصروف البيت ويديره في الغالب بيكون شحيح».     

وأكد أنه يجب على الزوج الرجوع لزوجته قبل اتخاذه أي قرار، «مش بحب لفظ الشركة في التعبير عن الزواج، لكن بحب لفظ الشراكة وهو أخف كتير من الشركة، لأن خناقات الفلوس بينهم ونصيب كل واحد في الربح ابتعاد عن المقصد الحقيقي من الزواج».

وأوضح أن هناك نوعين من القيادة، «النوع الأول القيادة العامة للأسرة والقيادة النوعية، الراجل هو حامي الأسرة، ومينفعش يبقى ماشي هو ومراته في الشارع والأسرة تتعرض لخطر ويقولها فيه تبادل للأدوار وفيه توزيع للمسؤوليات اتفضلي حضرتك دافعي.. دة اسمه هزار ومحدش بيرضى بيه».

مفهوم البطولة والتحدي

وعن مفهوم تحدي البطولة وتحدي الأميرة، قال: «المرأة هي اللي بتطلب من الزوج الحماية العامة للأسرة، ولو معملش كدة بتعتبره مش راجل ومش بطل، هي بتطلب منه كدة عشان يبقى بطل، واللي تقول لجوزها مش عاوزة حمايتك مش بتبقى حياتها الزوجية مستقرة».

وأشار إلى أن المرأة تتزوج لكي يكون زوجها قيمة إضافية في حياتها، ومن أهم هذه القيم الإضافية التي تتطلبها الزوجة من زوجها هو الأمان والاحتواء والحماية ضد المخاطر التي قد تتعرض لها.