بين «ميلك شيك بالفشار وغزل البنات بمشروب الطاقة وزجاجة مقلوبة».. قرر شاب الخروج عن المألوف عند قرار فتح مشروع خاص به لجذب الناس إليه، من خلال تقديم مذاق وشكل جديد ومميز يجعل الجميع يريدون تجربته.

محمود إبراهيم الذي يعمل في مجال التسويق، شرح لـ «هن»، أنه دائما يفضل الاختلاف عن الآخرون، الأمر الذي جعله يفكر في طريقة جديدة لتقديم المشروبات: «قررت اعمل تشكيلة جديدة بين ميلك شيك بالفشار وغزل البنات بمشروب الطاقة وغيره وأنا بنفسي اللي قعدت ابتكر طريقة عمل كل حاجة بالمكونات».

وعن الزجاجة المقلوبة، شرح محمود أن الكثير من الناس يعانون خلال تناول المشروب المضاف إليه مكعبات الثلج المجروش أن مذاقه يصبح خفيف أو تنتهي الصودا بسبب اختلاط الاثنين على بعض: «قررت بقى نقلب الإزازة اللي مش بتنزل غير لما المشروب يخلص من الكوباية، فتبدأ مع نفسها تصب وبكده محدش هيحس أنه بيشرب مية أو الصودا خلصت»، بحسب وصفه»

تبدأ أسعار المشروبات لدى محمود من 50 جنيه، ويختلف الأمر حسب الطلب والمضاف في الكوب: «في اللي يطلب ميلك شيك مع فشار أو مع أي نوع من الـ candy، أو غزل البنات أو مشروب الطاقة وغيره، فبيختلف السعر حسب اللي هيتعمل».

وعن الإقبال، حكى الشاب الذي فتح مشروعه منذ نحو 3 أشهر في أحد مجمع المطاعم الشهيرة في مدينة نصر أن الكثير من الناس يجذب انتباهها الأشكال والألوان الجديدة الذي يقدمها: «كمان الإضاءة الموجودة في المكان بتخلي الناس بتيجي وتسأل عن اللي بقدمه ويجربوا الحاجات اللي بيحبوها»، وفقا لوصف محمود.

كما يقدم محمود جميع المشروبات الساخنة والباردة بخلاف الغريبة والجديدة: «أنا أول واحد في مصر اقدم المشروبات دي، وبمكونات خاصة بيا أنا، وعندي كمان مشروبات جايبها من آسيا، وbubble، زي كور صغيرة بتفرقع وانت بتشربها».