كتب: آية أشرف - هبة أمين -
06:05 م | السبت 18 ديسمبر 2021
«يا أهل الخير عاوزة مساعدة فى إيجاد عروسة لجوزي، جوزي عاوز يتجوز» كلمات أثارت الجدل نشرتها إحدى السيدات، تُدعى «ثويبة صابر»، خلال الساعات القليلة الماضية، لتتصدر محركات البحث على مواقع التواصل الاجتماعي، ما بين اتفاق الرجال معها، وانتفاضة السيدات والزوجات ضدها، لكونها تبحث عن زوجة أخرى تشاركها زوجها.
وكشفت السيدة «ثويبة» عن مواصفات الزوجة الثانية، قائلة: «أهم حاجة بتعرف تطبخ وتكون ست بيت، ومتكنش مهيبرة، عاوزة واحدة هادئة ولطيفة، ومش متقبلة المزاج».
أضافت: «أقسم بالله ما بهزر إللى عندها استعداد يا أهلًا وسهلًا، وهو راجل محترم بيصون العشرة ده بجد مش تريقة وحقيقي بيحب البيت والأسرة ونعم الرجل، في الـ38 من عمره بس ميبانش عليه، وعاقل ورزين».
وعلى الفو ر تصدرت «ثويبة» التريند عبر المجموعات السرية الخاصة بالسيدات، متسائلين عن حقيقة المنشور، وهل هو حقيقي، أو محاولة للبحث عن الشهرة؟
وفي بث مباشر لـ «الوطن» أكدت السيدة ثويبة أن الأمر حقيقي، وجاد لأقصى درجة، قائلة: «جوزي عاوز يتجوز هو حر ومعملش حاجة حرام، وأنا موافقة على ده برده، ومش بعمل ما يغضب الله» .
وكشفت السيدة عن أنها تتمتع بقناعة شديدة، وفقًا لما نشأت عليه منذ الصغر: «عيلتي مؤمنة بالتعدد وفيها تعدد طبعًا، وده مخلي عندي سلام نفسي وقناعة شديدة، وعلى الرغم من ده محدش منهم اتدخل في قراري».
وتابعت ثويبة صابر: «عندي كتير من قرايبي معددين ومبسوطين جدًا فما المانع في ذلك؟».
واستنكرت السيدة ثويبة، زواج المصريات من الرجال العرب للمرة الثانية، ورفضهم للزواج كزوجة ثانية من رجل مصري.
وردت ثويبة صابر على الانتقادات التي طالت زوجها والتنمر عليه: «زوجي محترم وبيصوني، ومش ببص على حاجة غير كدة، بصوا راجل وسيم وخان مراته، لكن هو لأ».
وواصلت: «من حبي ليه عاوزاه يفرح ويتجوز، وهو فرحني كتير، ومش مُقصر معايا أبدًا، وعمره مازعلني، وجوازه كأنه مسافر عادي».
وأوضحت الزوجة أنها سيدة بها نواقص في بعض الأمور والطباع، مثل التقلبات المزاجية وغيرها التي تُسبب المشكلات: «إحنا مش قادرين نبعد رغم المشاكل، فليه أكون أنانية هو مش خاتم ولا فستان بتاعي هسيبه يكمل إللي ناقص فيا من غيري، أنا اللي ملكه وتحت إيده، مش هو اللي ملكي ولا تحت إيدي».
وكشفت الزوجة عن مواصفات الزوجة الثانية التي تبحث عنها لزوجها، حول إجادتها الطهي، وأن تكون ربة منزل، قائلة: «عندي مميزات كتير، لكن معنديش المميزات دي، وهو محتاجها وفي نفس الوقت محتاجني، فممكن يكمله مع شريكة تانية، هيكون ليها مكان لوحدها، ولازم هي تختار كل حاجة تريحها طبعًا».
وأشارت السيدة إلى أن زواج زوجها للمرة الثانية، هو أفضل من أن يقع في الخيانة، أو يتزوج دون علمها: «أحسن ما يقع في الحرام، وأنا عندي بنات، وأحسن ما يتجوز من ورايا، وهو مديني الحرية لو عاوزة اتطلق، لكن أنا عاوزاه ومقتنعة جدًا».
وأكدت الزوجة خلال حديثها أنها بالفعل وجدت العديد من الاختيارات بين العرائس: «لقينا عرايس كتير، وبنشوفهم ونسأل عليهم، وقريب إن شاء الله يتجوز وربنا يتمم بخير».
واختتمت السيدة: «أنا مش بدور ليه على خدامة، ولا واحدة تشيلني عشان أنا أعمل كاريري، لأ أنا بدور على سيدة تصونه ويصونها برده، وأنا مش بدور على تريند ولا بكره ولا رامياه، هو أفضل راجل ممكن تقابليه في حياتك».
