كتب: محمد عزالدين -
04:58 ص | الجمعة 13 أغسطس 2021
كشفت اللاعبة جيانا فاروق، صاحبة برونزية الكاراتيه بدورة الألعاب الأولمبية طوكيو 2020، عن سبب عدم ممارستها مهنة الصيدلة بعد تخرجها في 2018، قائلة: «لما اتخرجت مكنش عندي وقت اشتغل لأن اتخرجت 2018 والأولمبياد في 2020 قبل فيروس كورونا وتتأجل سنة، وبالتالي كانوا سنتين محتاجين تركيز».
وعلقت «فاروق» خلال لقاء ببرنامج «معكم منى الشاذلي»، المذاع على شاشة قناة «cbc»، وتقدمه الإعلامية منى الشاذلي، على ما أشيع حول اعتزالها لعبة الكاراتيه، قائلة: «مفيش حاجة اتقالت على لساني لها علاقة بالاعتزال، بس معظم الناس كانوا متوقعين ده، إن جيانا السنة دي هيبقى عندها 27 سنة وعملت كل البطولات وعملت كل حاجة فهتكمل ليه وهتتجوز كمان يومين».
وتابعت: «كتب كتابي يوم السبت إن شاء الله، خطيبي معيد هنا في كلية الهندسة وبيحضر الدكتوراة برة، وبينزل شهر واحد في السنة وظبطنا كتب الكتاب أنه يبقى بعد الأولمبياد، كان عاوز ينزل قبلها قولتله أنا مش هبقى مركزة معاك في حاجة، بقالنا سنة مشوفناش بعض واتقابلنا النهاردة في المطار، هو رجع الساعة 6 الصبح وأنا رجعت الساعة 11».
وواصلت: «أجلت زواجي بسبب طوكيو، وكنت قاعدة أقوله إدعي عشان نكتب الكتاب واحنا مبسوطين ويبقى فيه ميدالية، والحمد لله ربنا جبر بخاطرنا»، وفور إعلانها عن موعد خطوبتها أقدمت إحدى الحضور في ستديو البرنامج بإطلاق «زغروطة» فرحا بالمناسبة السعيدة.
واستكملت اللاعبة: «شوفت بطلات كتير كانوا فيه منهم نماذج في الكاراتيه اتجوزوا ورجعوا تاني يكملوا لعب، أبرزهم الكابتن شيماء أبواليزيد، فهي اتجوزت وخلفت أول بنت ولعبت بطولة العالم 2014 وبعد كده بطلت تاني وجابت بنوتة تانية ورجعت لعبت بطولة العالم 2018، وحصلت على ثالث العالم ودخلت في الترتيب الأولمبي وبعد كده حملت للمرة الثالثة فمكملتش».