رد مصدر مقرب في أسرة أحمد عبد الحليم، الشاب الذي اتهمته «إيمان السيد علي» باغتصابها، وزواجها وتزييف طلاقها، ورفض حصولها على كافة حقوقها الشرعية، على تلك الادعاءات، وقال إنها غير حقيقية بالمرة، «ده شغل نصب في نصب، وبتعمل كده لما بتعرف إنه خطب، وعملت كده أول مرة لما راح يخطب عملتلنا فضيحة، وجت قدام البيت وقالت هفضحكم وساب البنت بسببها».

القصة كاملة عبر الرابط: تتهم شابا باغتصابها ورفض زواجها.. إيمان: أهله عرضوا على عريس 3 شهور وبعدين اطلق «فيديو وصور» 

تفاصيل رد أسرة أحمد عبد الحليم على ادعاءات إيمان

وأكمل المصدر المقرب، في تصريحات خاصة لـ«هن» أن الشاب سمعته تضررت بسبب إيمان، «بقى عنده كام و30 سنة، ومش عارف يتجوز، من 10 أيام أحمد خطب، وساعتها اتجننت وجاتله وقالتله هعملك فضيحة، هي عايزاه يفضل زيها حاله واقف، وميتجوزش، رغم إن هي جالها عرسان، وبترفضهم عشان بتقول بحب أحمد وعايزاه، وقبل كده عرضت عليه يتجوزها عرفي ويتجوز واحدة تانية ورفضنا، كل اللي بتقوله إنها عايزة تتجوزه وبس عشان بتحبه».

وأكد المصدر أن تفاقم الوضع بين أحمد وإيمان كان بسبب علاقة جمعت بينهما، فكان لا بد من أن يتم الزواج بين الثنائي، «قالولنا تعالوا عشان ميصحش اللي حصل، وقعدنا عند العمدة وخدوا علينا ورق وكتبوا كتاب عشان نخلص الموضوع، وقعدنا قعدة تحقيق إحنا وأهلها وإقرارات ووصولات أمانة وقالوا يكتبوا الكتاب، ولو حصل بينهم حاجة ادينا جوزناهم وطلقناهم، ومرضيتش إن إحنا نجيب محامي، المحامي اللي جه تبعهم، والمأذونة تبعهم، وجت المأوذنة عمالة تعيط وتقول أنا ذنبي أيه لأن إيمان فضحتها في الفيديو، وهي أصلا تبع إيمان، والقعدة العرفية كانت في العمدة عند قريتهم».

وأكمل أن إيمان تستغيث لأنها تريد أخذ حقوقها الشرعية، والزوجية، على الرغم من إنها حصلت عليها كاملة، وكتبت إقرار على نفسها بذلك، «ده كله كدب في كدب واشتكت الكل، وعشان كدة أحمد بيرفع عليها قضية تشهير دلوقتي، وراح مباحث الإنترنت ومش هنسكت».

وحصلت «هن»، على صورة من وثيقتي الزواج والطلاق والإقرار على إيمان بحصولها على كافة حقوقها الشرعية.

وأوضح أن إيمان صورت هذا الفيديو لأنها تحب أحمد وتريده معها، «كل حاجة خدتها مضت عليها خدتها، الكلام ده من 2019 وهو لسه خاطب من 10 أيام واحدة دكتورة، وهي بتعمل كدة عشان خطب، احنا بلغناها عشان تسكت ومتجيش البيت، وبردو فضحتنا، في الدنيا كلها، وكله كذب، عايزاه يفضل زيها ميتجوزش».

قصة إيمان وأحمد

وكانت فتاة من مركز الحامول بكفر الشيخ، قد نشرت فيديو لها عبر موقع التواصل الاجتماعي «فيسبوك»، تتهم فيه شابا كانت تجمعها به قصة حب، وعلاقة عاطفية، بأنه اغتصبها، ثم رفض أن يتزوجها حينما طلبت منه، وظل يساومها، وحاول اغتصابها مرة أخرى إلا أنها تصدت له، وقالت إنها ذهبت معه لكتب كتابها، وبالفعل تزوجته، إلا أنها فوجئت بطلاقها في نفس اليوم، وبأنها مضت على وثيقة طلاق، وإقرار بأنها تسلمت كافة حقوقها الشرعية على الرغم من إنها لم تتسلم أي حقوق شرعية منه.

وحظى الفيديو ومدته 40 دقيقة على كثير من المشاهدات عبر موقع التواصل الاجتماعي «فيس بوك»، وجرت إعادة مشاركته آلاف المرات في محاولة لدعم إيمان، رغم أن كل ما قالته كان للافتراء عليه، حسب ما أكده المصدر لنا.