سنوات طويلة من المعاناة والخلافات الأسرية مع تعديات بالضرب وإهانات لفظية، عاشت خلالهم «أنوار مجدي» صاحبة الـ27 عاما، مع زوجها الذي يدعى «ك.أ» البالغ من العمر 28 عاما، أثمرت عن إنجاب طفلتين، وخلفت انفصالا بعد عرض القضايا أمام ساحات القضاء وتعرضها للتهديد بالقتل وغيره من الأفعال المشينة.

انفصال ورفض طلاق 

وتكشف الزوجة العشرينية خلال تصريحاتها لـ«هن»، تفاصيل معاناتها مع زوجها، والتي انتهت بانفصالها عنه، ورفضه تطليقها رسميا، قائلة: «عيشت معاه 6 سنين جواز ضرب وشتيمة وقلة أدب، وكل ده مكانش باين منه قبل الجواز، ولما لاقيت العيشة مستحيلة معاه طلبت منه الطلاق أكتر من مرة بس هو رفض، وقالي مش هطلق وهمرمطك في المحاكم».

خطف وتهديد بالقتل 

وتابعت «أنوار»، حديثها: «أخدت حكم بحضانة بناتي الاتنين، الكبيرة عندها 5 سنين ونص، والصغيرة سنة ونص، خطف الكبيرة مني هو وأهله، وحرمني من رؤيتها بقالي 10 شهور مشوفتهاش، وبعتلي أنا وأهلي ناس تهددنا بالقتل لو مبعتناش البنت التانية له، ولاقينا بلطجي بيكلمنا وهدد أخويا بالقتل، وكلم خالي عشان بيساعدني، وهدده بإنه هيغتصب بناته قدام عينه لو فضل واقف معايا».

تحرير محضر 

وسرعان ما اتجهت الزوجة التي لا حيلة لها، لتحرير محضر برقم 5777 إداري، قسم العامرية أول، لتفيد خلاله بتفاصيل ما تتعرض له وأسرتها من تهديدات مستمرة، «عملنا محضر عشان المهلة اللي البلطجي إداها لينا قربت تخلص، وأنا وأهلي مرعوبين تحصل لنا حاجة عشان هيموتونا، ومش عارفين نتحرك من البيت، وأخويا بينزل شغله بالعافية وهو مرعوب».

وتستغيث «أنوار»، بـ«الوطن»: «أنا عايزة حد يلحقني أنا وأهلي وخالي وبناته، مش عارفين نعيش، ومستنيين مصيبة تحصلنا في أي لحظة، لأن جوزي وأهله مستقويين ومحدش قادر عليهم».