أبدت الدكتورة مايا مرسي، رئيس المجلس القومي للمرأة، استنكارها لما يحدث من أزمات بسبب ملابس الفتيات، مؤكدة أن «كل واحدة لها الحق إنها تلبس اللي هي عايزاه بما لا يضر الآخرين».

وقالت مايا مرسي، خلال لقائها مع الإعلامي شريف عامر في برنامج «يحدث في مصر»، المذاع عبر فضائية «mbc مصر»: «احنا مستهلكين لأن إحنا عندنا قضايا تانية أهم كتير».

وأضافت: «طالما البنت بتلبس الفستان في المكان المناسب وطالما السيدة اللي بتلبس المايو والبوركيني في المكان اللي مسموح لها تعمل ده»، متسائلة «ليه بناخد مساحة كبيرة».

واعتبرت رئيس المجلس القومي للمرأة أن المجتمع يتغير للأسوأ: «المجتمع بيتغير للأسوأ وإحنا بنمشي عكس، وأنا بستغرب جدا لأن بتلاقي حد بينادي على الحرية على السوشيال ميديا، وفي نفس اللحظة يعلق على حد تاني ويقوله أنت إزاي تقول كده».

وطالبت مايا مرسي بعدم الاعتراض على ملابس الفتيات، «البنات أدوهم حقهم لأنها مخرجتش بمايوه في الامتحان لكن راحت بفستان، والسيدة الفاضلة مش هتنزل الشارع بالبوركيني أو المايوه، لكن هتروح بيه حمام السباحة، فهنسيبهم إذا كان ده مسموح بيه».

وشددت «مرسي» على ضرورة احترام الأماكن المقدسة أثناء دخولها، وإن كل مكان له الملابس المناسبة «ندخل الجامع والكنيسة وإحنا مغطيين شعرنا وده الطبيعي، وكلنا نمشي في الشارع محدش يكلمنا، وأنا قولت رأيي وكل واحدة لها الحق تلبس اللي هي عايزاه بما لا يضر الآخرين».