وضح اليوتيوبر أحمد حسن وزوجته زينب، ملابسات مقطع الفيديو، الذي ظهرا خلاله، عبر حسابهما الرسمي على موقع "يوتيوب"، وهما يتحدثان عما حدث معهما خلال الفترة الماضية التي أدت لاختفائهما وهي وفاة والد زينب، وفقدانهما التوأم اللذان كانا ينتظرانه.

وقال أحمد حسن في بداية حديثه في الفيديو الجديد: "اللايف ده مش معمول للناس الهمجية اللي داخلة تهاجم وخلاص، إحنا مبنطلعش نرد على الانتقادات ولا التنمر، إنما الموضوع زاد عن حده المرة دي، ومينفعش يطلع يتكلم فيه، حالة وفاة بتتكلموا في إيه".

"اللي عايز يدخل يشتم أو يقل أدبه، أنا مش همسح كومنتات"، بهذه العبارة بدأ اليوتيوبر أحمد حسن وزوجته زينب، حديثهما خلال مقطع الفيديو الجديد الذي بثه "حسن" عبر حسابه على موقع التواصل الاجتماعي"فيسبوك"، معلقًا على الانتقادات التي وجهت إليهما عقب ظهورهما في فيديو سابق وهما يتحدثان عن حالة وفاة والد زوجته وفقدانهما التوأم، "اللي حصل والد زينب توفى من 10 أيام، والفكرة إن زينب لسه راجعة البيت من يومين، وقالتلي نعمل فيديو نقول للناس ندعيله، وكان عندنا شغل وإعلانات وقفناها لمدة 10 أيام، لحد ما هى قررت نطمن الناس علينا".

وتابع مضيفًا، "كان بدايته طالعين نطمنكوا علينا وتدعوا لوالدها، وحكينا اللي حصل معانا كله، إنما اللي نزل على الفيسبوك ده نزل علشان المشاهدات، هعمل فيديو ليه والقناة بتاعتنا عليها فوق المليار مشاهدة، مش إحنا اللي يتقالنا ده، وبقالنا أكتر من 5 سنين على السوشيال ميديا".

وأضاف معبرًا عن غضبه من الانتقادات التي وجهت إليهما قائلًا، "القناة بتاعتي معموله عام، اتحدى أي شخص بيشوف اللايف ويشوف الفيديو اللي نزلناه ويقولي فيه لايك أو اشتراك أو شير، قسمًا بالله همسح القناة دلوقتي، مش أي حاجة تنزل تصدقوها وانتوا مش فاهمين حاجة".

"مراتك بتعيط في الفيديو وإزاي تصورها كدة"، كانت هذه الجملة التي أثارت سخرية اليوتيوبر، متسائلًا، "والدها متوفي ومش عايزينها تعيط، هى لو حتى بعد 200 سنة هتفضل تعيط، وبعد سنة هتقولوا أزاي بتستغلوا موت والدها اللي بقاله سنة في الضحك، الموضوع بدأ لما صحابنا نزلوا استوري عندهم إن والد زينب توفى، وبعد كدة أنا تعبت".

إحنا مش علماء ذرة.. إحنا ناس عاديين جدًا

وأشار "أحمد" خلاله حديثه موضحًا كواليس تصوير الفيديو، قائلًا، "كنا قاعدين عادي ومسكت الكاميرا، بشكلنا ولا قومنا لبسنا ولا سرحنا، وبدأت في الفيديو، مكنش في نيتنا أي حاجة غير الدعاء والاطمئنان".

استطرد اليوتيوبر خلال حديثه، "بعد 5 ساعات الناس كانت متفهمة الموضوع وبدأوا يترحموا على والدها، فجأة لقينا هجوم وانتقادات من الناس بيقولوا أننا بنستغل حالة الوفاة، هو أنتوا مجانين فين التجارة في كدة، انتوا عبيد، عايزين تجيبوا أسمنا في جملة مفيدة، بتوصلونا لحالة نفسية كبيرة، معندكوش رحمة في الموت".

ووجه أحمد رسالة لمنتقديه، "اعقلوا الكلمة اللي بتقلوها، اتقوا الله، وحسبي الله ونعم الوكيل".

أحمد حسن وزينب يوضحان حقيقة الاختفاء

ظهرت زينب، في مقطع فيديو مصور، خلال الساعات الماضية، مرتدية ملابس سوداء، باكية على رحيل والدها، في فيديو من تصوير زوجها، وهي منهارة في البكاء، ودموعها ظاهرة في الفيديو، وكان أحمد حسن جانبها يطلع متابعيه عن آخر تطورات حياتهما الشخصية.

وظهرت زينب وهي في مستشفى تعلق المحاليل بسبب حالتها النفسية السيئة عقب خسارة والدها، الفيديو مدته 17 دقيقة وفي يوم واحد شاهده ما يقرب من مليوني شخص.

ورغم الاستياء الظاهر على وجه زينب، إلا أنّ أحمد حسن زوجها قرر إكمال الفيديو وشرح كل ما يمران به.

الفيديو انتهي بطلب أحمد حسن من المشاهدين مزيدا من الـ"لايك"، والاشتراك في القناة، ما يحقق له ربحا عبر "يوتيوب"، غير عابئ بدموع زوجته أو ما يمران به من ظروف قاسية.

هذا الفيديو عرض الثنائي لهجوم شديد، معتبرين أحمد حسن لا يراعي حرمة بيته أو الظروف المحيطة به، وذلك عبر تعليقات على الفيديو المنشور عبر "يوتيوب".

وكان من بين التعليقات، "حتى موت البني آدم بتتاجروا بيه لا حول ولا قوة إلا بالله"، وفي تعليق آخر: "أنت بتصورها وهي كده ازاي، وهي موافقة تصورها وهي بالحالة دي ازاي وبتقولها متعيطش والكاميرا في وشها".

كما انتشر الفيديو عبر "فيسبوك"، وسط تعليقات سلبية على نشر هذا المحتوى.