كتب: آية أشرف -
11:45 ص | الثلاثاء 05 مايو 2020
"ربنا يفك سحرك ويبعد عنك اَي شر ويهديكي، وترجعي لبيت ربنا اللي اتعودتي تزوريه كل سنة ويوفقك لحياة جديدة سعيدة مع حد يستاهلك".. هكذا دون الفنان وائل عبدالعزيز، شقيق الفنانة ياسمين عبدالعزيز، عبر حسابه الشخصي على فيس بوك.
ولم يوجه الفنان منشوره لشخص بعينه، أو يشير له، لكنه جاء عقب إعلان شقيقته "ياسمين" زواجها هي والفنان أحمد العوضي، خاصة أنه أعلن من قبل رفضه لعلاقتهما.
ولم يتفاعل عدد كبير مع منشور "وائل".
وهاجم "وائل" شقيقته في مارس الماضي، حيث دون: "بصي يا ياسمين يا عبدالعزيز يا أختي.. أنا معاكي وفي ضهرك من وانتي صغيرة، شيلت مشاكل كتيًر بسببك، من وانتي عيلة صغيرة، بداية من مشاكلك مع الشاعر، وبرادة، وانتي عارفة إن أنا اتأذيت فيها إزاي، وقضية الشغالات مؤخرًا، غير قضية الضرب اللي كانت بينك وبين بنت هشام سليم، الممثلة اللي لبستيها التورتة في وشها".
وواصل: "وقفت جنبك بكل ما أملك من قوة أدافع عنك في كل موقف صعب مر عليكي، ونسيت حياتي، ونفسي عشانك وبقي كل همي أنا ووالدتك، إنك تكبري وتبقي نجمة في مجالك، سيبنالك اختياراتك كلها لنفسك، ووفقنالك على معظم قراراتك، وكنت الوحيد اللي ساندتك، ووقفت جنبك في طلاقك".
وأضاف: "لكن هنهرتل وتروحي تعرفي واحد أصغر منك بـ10 سنين، وتتصوري صور مالهاش أي لازمة على حساب سمعتك وسمعتنا، لا ومحدش هيسمح، من إمتى واحنا بنعمل أعياد ميلاد؟، وتنزل على السوشيال ميديا؟.. من إمتى الناس بتجيب في سيرتنا؟ ونقعد نتعاكس على السوشيال ميديا؟، ومع ذلك حياتك وانتي حرة فيها".
ثم عاد "وائل" ليفتح النار من جديد، قائلًا: "بص يا بني، أنا لما فاض بيا آخر مرة بعتلك رديت عليا وشتمت فيا وفي عيلتي، الغلط مش عليك، الغلط على اللي سابتك تغلط في أهلها كلهم، واللي يسمح لحد يغلط في أهله يسمح بأي حاجة تاني تحصلهم".
وأضاف وائل: "أنا عايز أعرف دلوقتي إنتو إزاي عايشين مع بعض في البيت والشغل بدون صفة؟ ولو في صفة محدش صرح بيها ليه؟! أنا بردو اللي بعمل فضايح وهيا دي الأصول؟ ما تعلنوا جوازكم، طيب قسمًا بالله أنا مش هسيب حقي وسمعتي وسمعة أهلي إلا لما الأمور تتحط في نصابها الصحيح.. واللي هيغلط فيا زي الناس اللي فاتت من الزملاء المطبلاتية أنا هاخد حقي بالقانون، وأخيرا للناس المحترمة لو ليك أخت حط نفسك مكاني؟!".
وبشكل مفاجئ أعلن كلا من ياسمين عبدالعزيز وأحمد العوضي، نبأ زواجهما بشكل منفصل دون الإشارة إلى الطرف الثاني من الزيجة، ورغم أن كلا الطرفين لم يكتب اسم الآخر ليكون بمثابة إعلان زواج رسمي بينهما، إلا أن الاعتراف بالحب، والتعليقات الرومانسية التي يتبادلها الطرفان مؤخرا عبر "السوشيال ميديا"، منذ شهور وحتى خلال شهر رمضان، تؤكد أن الزواج جرى بينهما.
