استغلت "آلاء عرفة"، 29 عاما، و"فاطمة"، 22 عاما، موهبتهما في الرسم على الأكياس البلاستيكية بألوانها المتعددة، فكرة جديدة عملتا على تنفيذها للحفاظ على البيئة، والتقليل من استخدام المواد البلاستيكية.

أصرت الشقيقتان على تطوير مهاراتهما في الرسم والتطوير منها، وبدأتا في ممارستها عن طريق الرسم بالقلم الرصاص، ثم الفحم، رسمتا كل وجوه المشاهير والمعالم السياحية والأثرية، حتى خلقتا لنفسيهما اختلافًا فى هذا المجال: "علشان نكون متميزين بنعمل حاجات محدش غيرنا عملها ولا قدمها، فبقينا نرسم على أى حاجة، لقينا نفسنا تلقائي بنحوش أكياس الزبالة ونرسم بيها"، بحسب حديث "آلاء" العشرينية.

وأوضحت بأن الرسم يكون من خلال قص الأكياس وربطها، وأحيانًا يضطرا إلى تسييحها بالنار: "بنستخدم مسدس الشمع كمان علشان ألزق الأكياس جنب بعضها علشان نعمل الشكل اللي عايزينه"، موضحة أن اللوحة الواحدة تستغرض ساعتين فقط لإنجازها بشكل جذاب: "لما بنكون قاعدين فاضيين يا إما بنقعد نفكر هنعمل إيه يا إما بنطلع صورة ونقلدها".

وترسم الشقيقتان أيضًا على الزجاج، باستخدام التراب: "لما الشتا بدأ يهل والتراب كتر قوي بهدل ترابيزة السفرة، وقبل ما أنضفها رسمت عليها حاجة للتسلية مش أكتر، من كتر حبي في الرسم ورغبتي إني عايزة أكون مختلفة ومميزة في المجال"، وعرفت الشقيقتان بين أسرتهما بحبهما لاقتناء الأكياس البلاستيكية: "ماما بقت تقول لاخواتي لمّوا الأكياس وإدوها لآلاء وفاطمة يعملوا لنا لوحة حلوة نحطها في الصالون".