عامان من الزواج مروا على "هدير. م" 28 عامًا، بعدما ارتبطت بزوجها "علاء. أ" 31 عامًا، قبل أن تقيم ضده دعوى "خلع" حملت رقم 1300/2019، لاستحالة العشرة بينهما.

زواج تقليدي وقع بين الطرفين، بعد فترة خطوبة لم تكمل 6 أشهر، تروي الزوجة لـ"هن": "اتعرفنا عن طريق صاحبة ماما واتجوزنا على طول في شقة أبوه القديمة بعد ما عملنا الشبكة بفترة، وقتها كان بيشتغل كاشير في مطعم لكن المشاكل بدأت لما حملت وبقيت أطلب مصاريف زي الناس مصروفات دكتور وحاجات البيبي الأمور الطبيعية بتاعت الناس".

خلافات بين الزوجين على مصروفات المنزل، تضيف: "كل ما أطلب حاجة يعملي حكاية ويقول معنديش مش معايا لما زهقت ويدوب أقوله أجيب منين أنا يعني ! يقولي بيعي الدهب بتاعك مهو قد كدا.. طبعا عمري ما هعمل كدا مش هبيع الدهب ورثي من أمي وشبكتي عشان أسدد بيها احتياجات ومصروفاته البيت".

زيادة في حدة الخلافات بعدما ترك الزوج العمل، توضح: "لما ساب الشغل بقى الضغط أكبر لدرجة إني خوفت ونقلت الدهب بيت أختي حسيت إن عينه عليه وخوفت لياخد حاجة من ورايا واللي حسبته لاقيته فعلا فتش في دولابي وعرف إني نقلت الدهب اتجنن مني وضربني لما قولتله اصرف على نفسك وبيتك مش هبيع حاجة أنت باصص في فلوسي ليه".

مطالبة بيع الشبكة قابلتها الزوجة بالرفض، توضح: "قالهالي كدا بصراحة عايز شبكتي وغوري من وشي يا فقر.. حياتي انتهت معاه خلاص مش حاسة معاه بأمان.. الراجل اللي مش قادر يفتح بيت وعينه في الدهب ميتعاشرش".