بعد نحو 10 أشهر على الزواج، أقامت «سمر.م» 26 عامًا، دعوى «خلع» حملت الرقم 1981/2019 ضد زوجها «نادر.ي» 31 عامًا، لاستحالة العشرة بينهما، بعدما خشيت ألا تقيم حدود الله (السبب الشائع الذي تلجأ إليه النساء عند الإقدام على مثل هذا القرار أمام المحكمة).

«البخل».. اتهام وجهته الزوجة إلى شريك حياتها ضمن أسباب إقامتها دعوى الخلع ضده، حيث روت «سمر» لـ«هن» سبب ذلك: «بخيل وبيستخسر فيَّا كل حاجة، حتى السجاير بيخبيها مني.. اتجوزنا عن حب جدا، وفي فترة الخطوبة كان شيك، وبيدفع كل حاجة، وسايبني على راحتي، لكن بعد الجواز اكتشفت إنه بيمثل، وجواه راجل شرقي مش مظبوط».

الخلافات بدأت بينهما بعد الزواج بسبب اختلاف الطباع: «إحنا عيلة نيكوتينية، وبنشرب سجاير وشيشة عادي، وهو كان متقبل ده في الأول، لكن بعد ما بقيت مراته، مش عاجبه أدخن قدام الناس، عشان أنا واحدة ست، وممكن أتفهم غلط، طيب ما أنت اتجوزتني وأنا بدخّن عادي ومقولتلكش هبطل، إيه حصل؟، يرد يقولي: دلوقت أنتي مراتي، وهتبقي أم لولادي».

إصرار على التحكم في طريقة حياتها، بحسب رواية الزوجة، وهو ما أوضحته: «طريقته اتغيرت جدا، وبقى عصبي، ومبيخرجش معايا، ويخبي مني السجاير، وفجأة كدا عايزني أبطل، وكل حاجة بعملها مش عاجباه، وأنا عندي شخصيتي وشغلي وحياتي، وهو اللي اتغير، ومعنديش استعداد أغير حاجة، ولما واجهته بكدا، زعل وساب البيت.. ومبيردش عليا، فخلاص جيت عشان أخلع وارتاح».