بعد نحو 11 عامًا من الزواج وإنجاب طفلين، أقامت السيدة الثلاثينية   «نجوى. م»، دعوى «طلاق» حملت رقم 1468/2018، للضرر من هجر زوجها لها منذ نحو عامين مدعية أنه هجرها بسبب «ترهل منطقة البطن وتعرضها للتشوه بسبب جرح الولادة القيصرية».

زواج عن حب بدأ منذ سنوات ماضية، تروي «هبة» لـ«هن»: «اتجوزنا بعد قصة حب بدأت لما كنا زملاء في العمل وأخدنا فترة لأن أهلي كانوا رافضينه لأن مستوى عيلته أقل مننا لكن وقفت جنبه لحد ما وافقوا واتجوزنا وخلفنا على طول وبعد الولادة جوزي اتغير لأن جسمي اتغير خصوصا إني ولدت قيصري وبقى يعلق كتير على شكلي ويتريق على بطني».

وتابعت: «لكن بعد أول ولادة قدرت أخس شوية لكن فضلت شكل الغرز واضحة وبعدها حملت وسقطت في السادس وحصلت لي مشاكل فعملت قيصرية تانية والدكتور عمل الغرز وحشة بقى شكل بطني شبه مشوه وبعد سنتين خلفت بنتي بردو قيصري لكني بعترف إن وزني زاد كتير غصب عني وقصرت معاه شوية لكن بسبب حمل مسؤولية الأولاد اللي هو ميعرفش عنهم أي حاجة.. فكان غصب عني».

خيانة زوجية هزّت أركان الأسرة تضيف: «لكن من فترة يمكن أكتر من سنتين اكتشفت إنه بيخوني مع واحدة على الفيس بوك وبينهم رسايل قلة أدب ولما واجهته عاب فيّ جامد وقال إني أهملت نفسي بعد الخلفة وإنه بقى يقرف من شكل بطني بسبب جراحة القيصرية».

عامين من الهجر بين الزوجين، تضيف الشابة الثلاثينية: «اتصدمت بعد ما عرفت خيانته وطريقة كلامه معايا نهت كل حاجة لكن كنت لسى بحبه فسامحت وحاولت أصح نفسي لكن بعدها فوجئت إنه بيكرهني وساب البيت وراح عند أمه من حوالي سنتين ورافض يطلق بحجة الولاد هيتشردوا بين أب وأم مطلقين ورافض يرجعلي.. عايز يسيبني كدا متعلقة وحتى المصاريف بتاعت البيت مش منتظم فيها فلجأت للطلاق عشان أضمن حقوقي وحقوق ولادي».